د پاکستان سرپرست لومړي وزیر په یوه خبري ناسته کې د ټاکنو د پایلو په اړه سیاسي ګوندونو او لاریون کوونکو ته وویل، چې د دغه هېواد خلکو د ټاکنو پایلې منلې دي.
انوارالحق کاکړ د وروستیو ټاکنو په ترسره کولو کې د دغه هېواد د ټاکنو د کمېسیون او د پوځ له کړنو هم دفاع وکړه.
ښاغلي کاکړ په داسې حال کې د ټاکنو کمېسیون او د هغې د پایلو دفاع وکړه، چې یو شمېر سیاسي ګوندونه د فبرورۍ د اتمې د عمومي ټاکنو په پایلو کې د درغلیو او لاسوهنو ادعاوې کوي.
د ډان ورځپاڼې د راپور له مخې، انورالحق کاکړ د سه شنبې په ورځ د (سلواغې ۲۴مه) د پاکستان پر سیاسي ګوندونو نیوکه وکړه چې په پاکستان کې د ټاکنیزو تشو د له منځه وړلو لپاره د "اغېزمنو قوانینو" په جوړولو کې پاتې راغلي دي.
په دې وروستیو ورځو کې یو شمېر سیاسي ګوندونو په کراچۍ او بلوچستان کې په ټاکنو کې د شفافیت د نشتوالي او د پراخو درغلیو له امله لاریونه کړي دي.