د ښځو د اعتراضي ډلو په ګډون د طالبانو ځینې مخالفې ډلې وايي، د دوحې په څېر نړیوالو غونډو ته د طالبانو بلل به دې ډلې ته د تاوتریخوالي د دوام جرات ورکړي. دغو ډلو نن په اعلامیه کې زیاته کړې، چې د افغانانو په غیاب کې باید له طالبانو سره له هر ډول سیاسي او ډیپلوماتیک تعامل ډډه وشي.
په دغه اعلامیه کې طالبان په جنګي جرمونو، تښتونو، د ښځو او د پخواني حکومت د کارکوونکو په وژلو او شکنجه، جنسیتي توپیر، نسل وژنه، جبري کډوالۍ او د افغانستان د بېلابېلو سیمو د اوسیدونکو د ملکیتونو پر غصبولو د ترهګرو ډلو په ملاتړ تورن شوي دي.
د ازداۍ جبهې، د مقامت جبهې، د ښځو اعتراضي ډلې، د اسلامي وحدت، اسلامي جنبش، د مقاومت شورا، اسلامي حزب، اسلامي جمعیت، اسلامي دعوت، اسلامي وحدت، د ازادۍ او عدالت هغه ګوندونه دي چې دا اعلامیه یې لاسلیک کړې ده.
له دې سره، د لوی مشرقي، لوی کندهار او د لوی شمالي شوراګانې، د افغانستان د خلکو د مقاومت او جهاد ارزښتونو د ساتلو بهیر او د افغانستان د خلکو همپالنې ګوند هم هغه ډلې دي چې دا اعلامیه یې لاسلیک کړې ده.
دوی له ملګرو ملتونو وغوښتل چې د دوحې ناسته کې د افغانستان ټولو ښکېلو سیاسي ګوندونو ته د ګډون زمینه برابره کړي، چې ټول ګډونه ملي پروسې له لارې "د خلکو په خوښه رامنځته شوی حکومت" جوړ شي.
په اعلامیه کې ټینګار شوی چې افغانستان ته د بشردوستانه مرستو دوام حیاتي ده، خو له طالبانو سره اقتصادي همکاري دوه جلا بحث دی.
یادو ډلو همداراز زیاته کړې ده، چې د افغانانو په غیاب کې باید له طالبانو سره له هر ډول سیاسي او ډیپلوماتیک تعامل څخه ډډه وشي.
دغو جریانونو د افغانستان لپاره د ملګرو ملتونو له ځانګړي استازي سره هم د همکارۍ اعلان هم وکړ.
د احتمال له مخې د دوحې په غونډه کې به د دغه استازي د ټاکلو په اړه پرېکړه وشي.
د یادولو وړ ده، چې دا لومړی ځل دی د طالبانو مخالفو ډلو په ګډه اعلامیه کې هوکړه کړې ده.
ټاکل شوې چې د افغانستان په اړه د دوحې ناسته د ملګرو ملتونو د سرمنشي انتونیو ګوترېش په کوربه توب د روانې میلادي میاشتې په ۲۹مه او ۳۰مه نېټه جوړه شي.
په دې غونډه کې به د څه باندې ۲۰ هېوادونو ځانګړي استازي ګډون وکړي.
د سرمنشي ویاند سټیفن دوجاریک ویلي، ملګري ملتونه د دوحې په غونډه کې له طالبانو سره د تعامل لپاره یوې همغږې تګلارې ته د رسیدو په هڅه کې دي.
د پکتیا حوزوي روغتون یو ډاکتر اصیل خان وايي، د سړې هوا او وچ موسم له امله په سلګونو ماشومان په سیخ و برېښ ناروغۍ اخته دي چې هره میاشت په منځنۍ کچه ۲۰ تنه یې مري.
هغه وايي، د دغه روغتون د ماشومانو څانګه د ۴۵ بسترو وړتیا لري خو دا مهال پکې تر ۱۲۰ پورې ماشومان بستر دي چې په یو کټ کې ان درې تنه ناروغ ماشومان پراته دي.
دا په داسې حال کې ده چې څه موده وړاندې د طالبانو د روغتیا وزیر ویلي و چې په ټول افغانستان کې د روغتیا په برخه کې جدي ستونزې نه لري او خلکو ته په سم ډول روغتیایي خدمتونه وړاندې کوي.
د پکتیا د لهجې منګل ولسوالۍ یوه اوسیدنکي سیداجان منګل افغانستان انټرنشنل پښتو څانګې ته د پنجشنبې په ورځ د (سلواغې۲۶مه) وويل چې په روغتون کې یې یوه اوونۍ ماشوم بستر و او د درملو او نورو امکاناتو د نشت له امله دوه ورځې وړاندې مړ شو: «شفاخانه شته خو دوا نشته، خلک ورځې هسې ماشومان او نور ناروغان ورولي او بیرته راځي، په شخصي کې مو وس نشته مجبور یو چې دغلته یې وروړو خو دوی هيڅ هم نه لري، مخکې دا شفاخانه ښه وه اوس هیڅ هم نه شته پکې.»
د ملګرو ملتونو د بشري مرستو د همغږۍ اداره (اوچا) وايي په افغانستان کې د ۲۰۲۴ کال روغتیایي خدمتونو لپاره ۳۶۷ میلیون ډالرو ته اړتیا لري.
دغه اداره وايي، هڅه یې داده چې په روان میلادي کال کې افغانانو ته روغتیایي خدمتونه وړاندې کړي.
