د طالبانو نیوکګر قاري عیسا محمدي وایي، د هغه د نیولو په دسیسه کې د طالبانو د کورنیو چارو وزیر سراج الدین حقاني مستقیم لاس درلود. ښاغلي محمدي له افغانستان انټرنېشنل سره په مرکه کې وویل، ایراني پولیسو د طالبانو په خبره دی له هوایي ډګره په دې پلمه ګرځولی و چې پاسپورټ یې جعلي دی.
نوموړی چې اوسمهال په فرانسه کې دی او خپل کور ته نه دی رسیدلی زیاتوي، چې طالبانو د قونسلګرۍ دوه لنډکروزر موټر اېستلي و او هڅه یې کوله چې دی بې هوښه کړي او بیا یې د «وي ای پي» میلمه په پلمه نیمروز ته ولیږدوي، خو یو شمیر خلکو یې مخه ونیوله.هغه په خپلو خبرو کې زیاته کړه، ایراني پولیسو شاوخوا شل ساعته بندي کړی و او تر څیړنو وروسته روښانه شوه چې پاسپورټ یې هیڅ کومه ستونزه نه لري او له ایران څخه د وتلو اجازه لري.د طالبانو دغه نیوکګر وایي، په دویمه ورځ کله چې بیا ځلې په هوایي ډګر کې د نوموړي د تګ مخه ونیول شوه، د مولوي فیض الرحمن عطایي او مولوي نبیل انور په نامه دوه کسان چې ځانونه یې په ایران کې د افغانستان د سفارت ډیپلوماټان وپيژندل د هغه د بیولو هڅه وکړه خو نوموړي ترې ځان خلاص کړ.ښاغلی محمدي وایي: «د طالبانو ډیپلوماتانو ته مې وویل چې هیڅکله خپله مبارزه نه پریږدم او د افغانستان د بشپړې ازادۍ او عدالت لپاره مې ملا تړلې ده.»محمدي د افغانستان انټرنېشنل د ویاندې د هغې پوښتنې په ځواب کې چې د ایران او طالبانو اړیکې څنګه ارزوي وویل، ایرانیان هم حیرانه دي چې له دغې ډلې سره څنګه اړیکې وساتي ځکه نه له دوی سره اړیکی جوړیدلی شي او نه هم اړیکې په بشپړه توګه له منځه تللی شي.نوموړي څو ورځې مخکې افغانستان انټرنېشنل ته ویلي و، چې د خپلو سوداګریزو چارو لپاره ایران ته تللی و، خو د ستنېدو پر مهال د ایران امنیتي ځواکونو هوايي ډګر کې وګرځاوه او ورته ویې ویل چې پر وتلو یې "بندیز" لګېدلی دی.
