په نږدې راتلونکي کې به د هنګري پارلمان په ناټو کې د سویډن غړیتوب تصویب کړي
د هنګري لومړي وزیر ویکتور اوربان د شنبې په ورځ ویلي، چې د دغه هېواد پارلمان به په راتلونکې اونۍ کې په ناټو کې د سویډن غړیتوب تصویب کړي.
د هنګري لومړي وزیر ویکتور اوربان د شنبې په ورځ ویلي، چې د دغه هېواد پارلمان به په راتلونکې اونۍ کې په ناټو کې د سویډن غړیتوب تصویب کړي.
اوربان وايي: "دا ښه خبر دی چې له سویډن سره به زموږ شخړه ژر حل شي.»
سویډن نږدې دوه کاله مخکې د ناټو د غړیتوب غوښتنه کړې وه.
هنګري د ناټو یوازینی غړی دی چې تر اوسه یې د سویډن غوښتنه نه ده تصویب کړې. دې ځنډ د هنګري او متحده ایالاتو په اړیکو سیوری اچولی او د هنګري د متحدینو اندیښنې یې راپارولي دي.
د هنګري پارلمان به د فبرورۍ په ۲۶مه په دې اړه غونډه وکړي.
د اوربان په وینا، هغه او د سویډن لومړي وزیر اولف کریسترسون د دواړو هېوادونو ترمنځ د باور د بیا رغولو لپاره ګامونه پورته کړي دي. نوموړي د دغو ګامونو په اړه وضاحت نه دی ورکړی.
ایراني رسنیو خبر ورکړی، چې په سیستان او بلوچستان ایالت کې د هلمند سیند د اوبو د کمیسیون ۲۷مه ناسته بې پایلې پای ته ورسېدلې ده. د ایرنا د راپور له مخې، په دغه ناسته کې د ایران استازیو د هلمند په سیند کې د بندونو د جوړولو په شمول د خنډونو په لرې کولو ټینګار کړی.
دغه ناسته د ایران او طالبانو د استازو په ګډون د سلواغې میاشتې په ۲۵ او ۲۶ نیټه د ایران د سیستان او بلوچستان ایالت په زابل ښار کې جوړه شوې وه.
ایرنا خبری اژانس د ایران د اسلامی جمهوریت د انرژۍ د وزارت په حواله لیکلي، چې دغه غونډه د ایران او افغانستان ترمنځ د ۱۳۵۱ کال د هلمند د سیند د تړون د پلي کولو په موخه جوړه شوې وه.
د ایران د انرژۍ وزارت وايي، چې د دغه وزارت استازو په دې ناسته کې د طالبانو استازو ته په وروستیو کلونو کې د هلمند له سیند څخه د ایران د اوبو حق د نه رسیدو په اړه مفصل راپور وړاندې کړی دی.
د ایران استازو د دغه سیند په اوږدو کې د شته تخنیکي ستونزو او موانعو پر لرې کولو ټینګار کړی چې د ایران د اوبو د حق مخه یې نیولې. دغو چارواکو، د افغانستان له خوا د جوړو شوو بندونو او په ځانګړي ډول د کمال خان بند پر لرې کولو ټینګار کړی.
د دغه راپور له مخې، طالبانو په افغانستان کې سخته وچکالي د ایران د اوبو د حق په برابرولو کې خڼډ بللی خو دغه دلیل د ایراني استازو له خوا ننګول شوی دی.
په هلمند سیند کې د ایران د اوبو د حق موضوع د طالبانو او د ایران د اسلامي جمهوریت تر منځ یوه جنجالي مساله ده. ایران وايي، چې د هلمند له سیند نه یې د اوبو حق نه ورکول کیږي، خو طالبان د دغه کار دلیل په افغانستان کې وچکالۍ پورې تړلی دی.
تر دې مخکې یو ایراني پلاوي د هلمند له سیند څخه لیدنه کړې وه او د اسلامي جمهوریت چارواکو هم وچکالي او په هلمند سیند کې د اوبو کمښت موضوع تایید کړې وه. خو په همدې حال کې، ایران د سیند په اوږدو کې د بندونو پر جوړولو اعتراض کړی.
د ایران د دفاع وزارت د شنبې په ورځ د بالستیک توغندیو ضد توغندیز سیسټم او د ټیټې ارتفاع هوايي دفاعي سیسټم پرانسته وکړه. ایرنا خبری اژانس وایي، چې دغه نوی هوايي دفاعي سیسټمونه به د ایران دفاعی ځواک د پام وړ ډیر کړی.
دغه توغندیز سیسټمونه چې په ارمان توغندیو او د اذرخش هوايي دفاعي سیسټم نومول شوي، د پرانېستې مراسو کې یې د ایران د دفاع د وزیر جنرال محمد رضا قرايي هم ګډون کړی و.
د ایرنا د راپور له مخې د ارمان توغندي سیسټم کولای شي چې په یو وخت کې له ۱۲۰ تر ۱۸۰ کیلومتره واټن کې شپږ هدفونه په نښه کړی.
په ورته وخت کې د اذرخش هوايي دفاعي سیستم کولای شي چې تر ۵۰ کیلومتره واټن پورې څلور توغندي په هممهاله توګه کشف او له منځه یوسي.
ایران په داسې حال کې د خپلو نویو توغندیو او دفاعي لاسته راوړني نندارې ته وړاندي کوي، چې په سیمه کې کړکېچونه ډېر شوي دي.
په یمن کې د ایران له ملاتړه برخمنه حوثي ډله په دوامداره توګه له غزې سره د پیوستون د ښودلو په موخه په سور سمندرګي کې د امریکا، بریتانیا او اسراییلو پر بیړیو بریدونه کوي.
د دغو بریدونو په ځواب کې امریکا او بریتانیا په یمن کې دننه د حوثي جنګیالیوو مرکزونونه په نښه کړي او په سوریه او عراق کې یې د ایران له ملاتړه برخمنو ډلو پر مرکزونو بمباري کړې دي.
د پښتونخوا ملي عوامي ګوند مشر وايي، په دغه هېواد کې پارلماني ټاکنې، د پوځ د هدایت په اساس او د پوځي یونیفورم په وسیله شوې دي. پارلمان ته کامیاب محمود خان اڅکزی زیاتوي: "په پارلمان کې د هغو ګوندونو ملاتړ کوو چې دا پیغام راوړي چې د پاکستان په سیاست کې به د پوځ رول له منځه وړي.”
نوموړي دا خبرې نن په کوټه کې د پاکستان په ټاکنو کې د درغليو په ضد د څلور ګوندونو په اتحاد جوړې شوې مظاهرې ته د وینا پرمهال وکړې.
هغه پوځ ته په اشارې سره وویل: “دوی ځکه غواړي یو ضعیف پارلمان غواړي دوی پرې خپلې ګناوې پرې معاف کړي.”
که څه هم د پاکستان د فبروري د اتمې ټاکنو کې د عمران خان پلویانو د ۹۲ څوکیو ګټلو سره تر نورو مخکې دي، خو دغه ګوند تور لګوي چې ټاکنو کې درغلي شوې او په مقابل کې یې مظاهرې پیل کړې دي.
محمود خان اڅکزی هم په ټینګار سره وايي، چې د عمران خان ملاتړی نه دی، خو د پاکستان عامو خلکو د ښاغلي خان ګوند ته رایه ورکړې ده.
هغه وویل، چې دی یو قوي پارلمان جوړېدو لپاره لومړنۍ حل لاره دا ده چې د عمران خان او د هغه د ملګرو پر وړاندې جوړې شوې دوسیې ختمې او نوموړی له زندانه خوشی شي.
محمود خان اڅکزي د پاکستان حکومت ته خبرداری ورکړی چې که د دوی د خلکو د رایو درناوی ونشي، بیا به د بلوچستان په هوايي ډګرونو کې هیڅ الوتکه ونشي کیناستلی، د بلوچستان د اورګاډي اډې ته به هیڅ یو اورګاډی ورنشي او له پاکستانه به هیڅ بدمعاش ته بلوچستان ته د ورننوتلو اجازه ور نه کړي.
په همدې حال کې په پلازمېنه اسلام اباد کې هم د ګڼو سیاسي ګوندونو پلویانو اعتراضیه غونډې کړې دي او د دغه هېواد پر پوځ یې تور پورې کړی، چې په ټاکنو کې یې درغلیو ته لمن وهلې.
د اوکراین د پوځ مشر اعلان وکړ، چې ځواکونه یې د دغه هېواد له ختیځ ښار اودیوکا څخه وتلي دي. اوکرایني پوځ داسې مهال له دغه ښاره وځي، چې کیف د وسلو او مهماتو له سخت کمي سره مخامخ دی.
دغه په شاتګ کولای شي، چې د روسیې د ستر پرمختګ لپاره لاره هواره کړي.
الکساندر سیرسکي چې نوی د اوکرایني پوځ مشرتوب یې تر لاسه کړی، ویلي چې ځواکونه یې له ښاره د باندې امنو اډو ته ستانه شوي دي.
هغه په یوې خبرپاڼه کې لیکلي، چې له اودیوکا ښاره یې د پوځونو وتنه د دې لپاره وه چې له کلابندۍ خلاص او په امن کې پاتې شي.
تر دې وړاندې د امریکا ولسمشر جو بایډن ویلي و، چې اودیوکا ښار په کانګرس کې د جمهوري غوښتونکو لهخوا د اوکراین سره د مرستو ځنډولو له امله د روسانو لهخوا د سقوط سره مخامخ دی.
اوکراین سره د امریکا نوې پوځي مرستې له څو میاشتو راهیسې د کانګرس وروستۍ پرېکړې ته ځنډېدلې دي.
روسیې د اکټوبر میاشتې راهیسې پر اودیوکا ښار بریدونه زیات کړي او د رویټرز په وینا، له څو اونیو راهیسې د اوکراین پوځي اډې نهیلې کوونکې ښکارېدې.
دغه ښار ډېر ارزښتناک ښار بلل کېږي، چې پر هغه د روسیې ولکه کولای شي چې په جګړه کې د روسیې دریځ لا ډېر پیاوړی کړي.
د خیبر پښتونخوا په پېښور ښار او شاوخوا سیمو کې د پخواني لومړي وزیر او د تحریک انصاف ګوند مشر عمران خان پلویانو تېرې ټاکنې له ټګیو برګیو ډکې بللې او د خپل ګوند د غوڅ بري او د مرکزي حکومت د جوړولو دعوې یې کړې دي.
بل پلو په پلازمېنه اسلام اباد کې هم د ګڼو سیاسي ګوندونو پلویانو اعتراضیه غونډې کړې دي او د دغه هېواد پر پوځ یې تور پورې کړی، چې په ټاکنو کې یې درغلیو ته لمن وهلې.
دغو لاریونیانو غوښتل، چې د اسلام اباد د خبریالانو ټولنې (پرېس کلب) مخې ته پرلت ووهي؛ خو پولیسو یې مخه نېولې او دغه سیمه کې یې داسې خنډونه جوړ کړي، چې معترضین نه شي کولای ترېنه واوړي.
بل پلو په بلوچستان صوبه کې سیاسي ګوندونو هم لاریونونه کړي، چې تر ډېره د کویټې ښار تر څنګ د دغې صوبې بېلابېلو ولسوالیو کې د لاریون کوونکو پرلتونه همدا اوس هم روان دي.
په دغو لاریونونو کې د پښتونخوا ملي عوامي پارټۍ، بي اېن پي مېنګل، نشنل پارټۍ او هزاره ډیموکراټیک پارټۍ غړو برخه اخیستې ده.
دغو اعتراض کوونکو تور پورې کړی، چې پوځ غواړي په لوی لاس ملت پال ګوندونه له پارلمان او سیاست څخه لرې کړي او پر ځای یې د دوی د خوښې کسان پارلمان ته راولي.
دغه لاریونوال د پاکستان د ټاکنو کمېسیون له مشره غواړي، چې له دندې دې استعفا وکړي.
د بلوچستان تربت، ګوادر او پنجګور کې زرګونه معترضینو پرلتونه وهلي او په یوه خوله وایي، چې د ټاکنو اعلان شوې پایلې نه مني.
د دې تر څنګ په سند صوبه، لاهور او نورو سترو ښارونو کې هم د ټاکنو د اعلان شویو پایلو پر ضد خلک لارو کوڅو ته راوتي او د ټاکنو کمېسیون یې په درغلیو تورن کړی دی.
خو د پاکستان لنډمهاله حکومت له معترضینو غوښتي، چې په غونډو کې دې له تاوتریخوالي ډډه وکړي او خپلې ټولې غوښتنې دې له قانوني لارو له حکومتي اړونده چارواکو او یا محکمو ته وړاندې کړي.
د فبرورۍ په اتمه په پاکستان کې د قومي اسمبلۍ او ایالتي شوراګانو له پاره ټاکنې وشوې، چې یو سیاسي ګوند هم غوڅ اکثریت نه دی ترلاسه کړی چې په ځانته سر د حکومت جوړولو جوګه وي.
همدا اوس هم د بېلابېلو سیاسي ګوندونو تر منځ د جوړ جاړي خبرې روانې دي؛ خو تر اوسه داسې ښکاري چې دغه ګوندونه سره یوې ځانګړې پرېکړې ته نه دی رسېدلي.