د طالبانو ویاند منلې چې لا هم له افغانستان څخه د مخدره توکو قاچاق دوام لري
د طالبانو وياند ذبيح الله مجاهد وايي؛ سره له دې چې په افغانستان کې د نشه يي توکو پر وړاندې مبارزه کې پرمختګ شوى، خو د دغو نشه يي توکو قاچاق لا هم دوام لري.
د طالبانو وياند ذبيح الله مجاهد وايي؛ سره له دې چې په افغانستان کې د نشه يي توکو پر وړاندې مبارزه کې پرمختګ شوى، خو د دغو نشه يي توکو قاچاق لا هم دوام لري.
ښاغلي مجاهد ویلي، لا هم د دغو مخدره توکو د قاچاق لپاره بېلابېلې لارې شته او له شته ذخیرو د لیږد بهیر دوام لري.
د طالبانو ویاند دغه څرګندونې د روسیې د امنیت شورا د منشي نیکلای پاتروشف د څرګندونو په غبرګون کې کړې دي.
د روسیې د امنیت شورا سرمنشي د جمعې په ورځ (د سلواغې ۲۷) په بشکک کې یوه غونډه کې خبرداری ورکړ چې په افغانستان کې تولید شوي مخدره مواد به په لنډه موده کې له زړو زېرمو څخه د منځنۍ اسیا هېوادونو ته قاچاق شي.
نیکلای پاتروشف وویل، معلومات ښيي چې له افغانستان څخه منځنۍ اسیا ته د مخدره موادو قاچاق کم شوی نه دی.
ذبیح الله مجاهد د طالبان تر واک لاندې د افغانستان ملي ټلویزیون سره په مرکه کې ویلي، چې د نشه یي توکو پر وړاندې د طالبانو مبارزه "پراخه" ده. هغه وايي، چې سره له دې چې کروندګر له اقتصادي ستونزو سره مخامخ وو، خو د کوکنارو د کښت ډېره برخه له منځه تللې ده.
همدا راز، هغه تاييد کړه چې طالبان تراوسه نه دي توانېدلي چې د نشه يي توکو د قاچاق مخه ونيسي. هغه وويل: "په نهایت کې داسې یوې پایلې ته ونه رسیدو چې د نشه یي توکو له قاچاقه سل په سلو کې مخنیوی وکړي.»
