هېدربار: د افغانستان لپاره د ځانګړي استازي د ټاکلو په اړه د ګوترېش خبرې د اندېښنې وړ دي
د بشري حقونو د ښځو د برخې مسوولې د افغانستان لپاره د ځانګړي استازي د ټاکلو په اړه د ملګرو ملتونو د سرمنشي په وروستیو څرګندونو نیوکه وکړه.
د بشري حقونو د ښځو د برخې مسوولې د افغانستان لپاره د ځانګړي استازي د ټاکلو په اړه د ملګرو ملتونو د سرمنشي په وروستیو څرګندونو نیوکه وکړه.
انتونیو ګوترېش د دوحې له دوه ورځنۍ ناستې وروسته په یوه خبري کنفرانس کې وویل، چې د افغانستان لپاره د ځانګړي استازي ټاکل باید د طالبانو د منلو وړ هم وي.
هېدر بار د سې شنبې په ورځ (د کب لومړۍ) پر خپل اېکس لیکلي، چې له طالبانو سره دغه ډول چلند د دې لامل کیږي، چې د بشري حقونو فعالان د ملکرو ملتونو د ژمنو په اړه شک وکړي.
هېدر بار وایي: "ددې اورېدل چې انتونیو ګوترېش وایي باید ولیدل شي چې څوک کولی شي ځانګړی استازی وي، چې د طالبانو لپاره د منلو وړ وي، د اندېښنې وړ دی."
د دوحې ناسته د یکشنبې او دوشنبې په ورځو د ملګرو ملتونو د سرمنشي انتونیو ګوترېش په کوربتوب د نړۍ د ۲۵ هېوادونو د استازو په حضور کې ترسره شوه.
دغې غونډې ته طالبان هم بلل شوي وو؛ خو دغې ډلې پکې کډون و نه کړ.
د افغانستان د مدني ټولنې په استازیتوب پنځه کسان د دوحې ناستې ته بلل شوي وو؛ خو روسیې د طالبانو په غوښتنه له یادو استازو سره و نه کتل.
