د طالبانو د ریاست الوزرا سياسي مرستیال د جاپان له سفير سره په لېدنه کې ويلي، چې هڅه کوي، د ملګرو ملتونو او نورو نړېوالو غونډو کې مثبته او مانا لرونکې برخه واخلي. هغه د دوحې له غونډې یوه ورځ وروسته ویلي، چې دوحې ته نه ورتګ یې له نړېوالي ټولني سره د اړيکو خرابوالي په مانا نه دی.
په افغانستان کې د طالبانو تر واک لاندې ملي ټلویزیون نن سې شبنه د طالبانو د سیاسي مرستیال مولوي عبدالکبير او په کابل کې د جاپان د سفير تاکايوشي کورمايا د ليدنې خبر ورکړی.
په خبر کې د طالبانو د سياسي مرستيال له قوله لیکل شوي، چې نوموړي د ملګرو ملتونو د سرمنشي د دوحې غونډې اعلان ته په ښه نظر ګوري.
هغه زياتوي: «موږ د ملګرو ملتونو د سرمنشي اعلان ته په ښه نظر ګورو او هڅه کوو، چې په نړېوالو غونډو کې مثبت او مانا لرونکی ګډون ولرو.»
مولوي عبدالکبیر زياته کړې، چې د دوحې په ناسته کې د ګډون لپاره یې ټول شرایط وړاندې کړي وو؛ خو د ده په خبره د ناستې جوړوونکو دغه فرصت له لاسه ورکر.
د طالبانو دغه چارواکي ټينګار کړی، چې د دوحې په غونډه کې نه ګډون له نړۍ سره د دوی د اړيکو د خرابوالي په مانا نه دی.
په ورته وخت کې په همدې لېدنه کې د افغانستان لپاره د جاپان سفير کورمايا ويلي، چې جاپان د طالبانو او نړۍ ترمنځ د اړيکو د جوړېدو هڅه کوي.
د ملګرو ملتونو سرمنشي انټونيو ګوټرېش په دوحه کې په خپله وينا کې په اخطاريه ډول ويلي وه، هیله من دی، چې د ملګرو ملتونو او طالبانو ترمنځ خبرې به د «جلاکېدو» لامل نه شي.
د دوحې ناسته د ملګرو ملتونو د سرمنشي په کوربه توب جوړه شوې وه، چې د افغانستان د مدني ټولنې په استازيتوب پنځه کسانو ته بلنه ورکړل شوې وه؛خو طالبانو په کې ګډون ونه کړ.
