د تحریک انصاف ګوند مشر عمران خان د راولپنډۍ له بند څخه د خپل پخواني مدافع وکیل په لاس د یوه پیغام په استولو سره ویلي، چې د پاکستان د ټاکنو خپلواک کمېسیون مشر د ټاکنو په درشل کې د درغلیو په مخنیوي کې پاتې راغلی؛ نو باید استعفاء وکړي.
د عمران خان په مشرۍ د تحریک انصاف ګوند وایي، چې د پاکستان د ټاکنو کمېسیون و نه توانېد چې ټاکنې په ازاده، عادلانه او شفافه توګه ترسره کړي.
عمران خان په ټاکنو کې د ګډوډیو له امله د پاکستان د ټاکنو د خپلواک کمېسیون د مشر سکندر سلطان راجا د ژر تر ژره استعفاء غوښتنه کوي.
ډان ورځپاڼې د سې شنبې په ورځ (د کب لومړۍ) راپور ورکړی، چې عمران خان دغه غوښتنه تر هغه وروسته کړې، چې ګوهر علي خان د راولپنډۍ په بند کې له نوموړي سره وکتل.
ګوهر علي خان د عمران خان له قوله ویلي، چې سکندر سلطان راجا په ټاکنو کې د درغلیو په مخنیوي کې پاتې راغلی.
د عمران خان پخواني مدافع وکیل د پاکستان د ټاکنو د کمېسیون د یمشر په اړه وویل: "هغه حق نه لري چې یوه ورځ هم په دې مقام کې پاتې شي."
نوموړی همداراز د فبرورۍ د اتمې نیټې د ټاکنو د ترسره کېدو په اړه د څیړنو غوښتنه وکړه.
د نوموړي په خبره، د تحریک انصاف ګوند غواړي چې د ټاکنو پایلې د قانون په اساس وشي.
سره له دې چې د پاکستان د ټاکنو له ترسره کیدو دوه اونۍ تیریږي، خو تراوسه پورې ددغه هېواد د لومړۍ وزیرۍ برخلیک معلوم نه دی.
د یادولو ده، چې د پاکستان پيپلز ګوند او د مسلم ليګ (ن) ګوند چې تېره اوونۍ د حکومت جوړولو لپاره ائتلاف وکړ، تر اوسه د ائتلافي حکومت د جزياتو په اړه هوکړې ته نه دي رسیدلي.
