د چمن پرلتوال: تېره شپه ناوخته نږدې شل پرلتوال پولیسو بندیان کړي
تېره شپه ناوخته پولیسو پر پرلتوالو چاپه وهلې او نږدې شل کسان یې بندیان کړي دي. د بلوچستان ایالت د اطلاعاتو وزیر وايي، پرلتوالو له قانونه سرغړونه کړې او د پاسپورټ اداره یې تړلې وه.
تېره شپه ناوخته پولیسو پر پرلتوالو چاپه وهلې او نږدې شل کسان یې بندیان کړي دي. د بلوچستان ایالت د اطلاعاتو وزیر وايي، پرلتوالو له قانونه سرغړونه کړې او د پاسپورټ اداره یې تړلې وه.
سپین بولدک ـ چمن پر دروازه د پاسپورټ د جبري کېدو په غبرګون پرلت کوونکو دوه ورځې وړاندې په چمن کې د پاسپورټ ادارې دروازه د کانټینرونو په اېښودلو بنده کړه؛ خو تېره شپه ناوخته د چمن پولیسو پر پرلت چاپه وهلې او نږدې شل پرلتوال یې بندیان کړي دي.
دغه پرلتوالو د خپلو ملګرو د بندې کېدو په غبرګون د چمن ـ کوټې عمومي لاره بنده کړې او په چمن ښار کې یې کاربندیز اعلان کړ.
د چمن د لغړي اتحاد مشر غوث الله اڅکزی وايي:« تېره شپه ناوخته زموږ ۱۵ څخه تر شل تنو ملګري د چمن پولیسو له ځان سره وړي او ټول یې بندیان کړي دي. موږ چې د پاسپورټ ادارې مخې ته کانټینرونه اېښي وو هغه یې وړي دي. زه پر ولس غږ کوم، چې د کوټې لاره او د چمن ښار بند کړي.»
بل خوا پرلتوال وايي، د پولیسو او ځايي چارواکو فشارونو ته نه تسلیمېږي او خپلې مبارزې ته دوام ورکوي.
د بلوچستان ایالت د اطلاعاتو سرپرست وزیر جان اڅکزي پر خپلې اېکس پاڼه لیکلي، په چمن کې پرلت وهونکو له قانونه سرغړونه کړې او د پاسپورټ اداره یې تړلې ده. پولیسو له قانون څخه سرغړونکي پرلتوال نیولي دي.
نوموړی وايي، د افغانستان او پاکستان تر منځ په پاسپورټ د تګ راتګ پرېکړه نه بدلوي او په دغه برخه کې هیڅ خنډ ورته د زغم وړ نه دی.
