د برېټانیې د پارلمان غړې برونس کینیډي وویل که چیرې هزاره ټبري له دغه هیواد څخه رونډا ته ولیږدول شي نو دوی به د خپلې مذهبي عقېدې له امله له ځورونې سره مخ شي. هغې زیاته کړه چې په افغانستان او پاکستان کې هزاره ټبري د طالبانو او نورو سخت دریځو ډلو له لوري ځورول کیږي.
نوموړې د برېټانیې په پارلمان کې وویل چې د طالبانو له واکمنۍ وروسته له افغانستانه برېټانیا ته د تښتېدلو کسانو ډېر شمېر هزاره ګان دي.
اغلې کینیډي زیاته کړه چې هغې تېرکال یوه څېړنه ترسره کړه چې د هغې څېړنې پر بنسټ هزاره ګان د طالبانو او «نورو سخت درېځو ډلو» له ګواښ سره مخ دي.
د هغې په وينا، که چېرې هزاره کډوال رونډا ته ولېږدول شي، نو هلته به هم د خپلو مذهبي عقېدو له امله خوندي نه وي.
د برېټانیا حکومت غواړي هغه پناه غوښتونکي چې د سمندر له لارې برېټانیا ته ننوځي په کوچنیو کښتیو کې د دوی د قضیو تر څېړلو پورې رونډا ته ولېږدوي. خو د برېټانیې دغه پلان په کور دننه له پراخو غبرګونونو سره مخ دی.
د برېټانیا سترې محکمې په لړم میاشت کې دغه پلان ناقانونه اعلان کړ.
