د اسټرالیا په ویکتوریا ایالت کې د شنبې په ورځ اورلګېدنه له کنټروله وتلي او چارواکو د دغه ایالت په لوېدیځ کې د هغو سلګونو کورونو د تخليې لپاره نوی خبرداری خپور کړی چې هلته د خطر کچه تر ټولو لوړه ده.
دغه بیړنی خبرداری د شنبې په ورځ په یو بل ځنګل کې د اورلګیدنې کچې تر ټیټیدو وروسته خپور شوی چې د اونۍ په سر کې پیل شوې وه او له امله یې د خلکو څاروي وژل شوي، کورونه ویجاړ شوي او تر ۲ زره کسان د خپلو کورونو پریښودو ته اړ شوي دي.
دغو بې ځایه شويو کسانو، د ملبورن په لویدیځ کې بلارات ښار ته پناه وړې ده.
دغه نوی اور د امفیتیټر ښارګوټي کې لګېدلی چې ۲۲۳ کسان پکې ژوند کوي.
د بیړنو حالاتو ادارې په خپله ویب پاڼه لیکلي: "مخکې له دې چې وضعیت خطرناک شي، د کورونو سمدستي پریښودل تر ټولو خوندي انتخاب دی”
دغې ادارې زیاته کړې چې اورلګیدنه تر کنټرول وتلې ده.
د اسټرالیا ای بی سی رسنۍ د شنبې په ورځ راپور ورکړی چې په دې اونۍ کې د ویکتوریا ایالت کې د ځنګلي اورلګیدنې له امله درې کورونه او څو ودانۍ ویجاړې شوې دي.
شاوخوا ۱۰۰۰ اور وژونکي چې له ۵۰ څخه زیاتې د اوروژنې الوتکې یې ملاتړ کوي، د دغې اورلګیدنې د کنټرولولو هڅه کوي.
