د ملګرو ملتونو د انساني حقونو شورا کې د روسیې د پلاوي غړی په افغانستان کې د امریکا، برتانیا او د ناټو د نورو غړو شل کلن پوځي حضور د دغه هېواد د اوسنیو ستونزو یو اصلي لامل بولي.
روسلان ستروګانوف وايي، چې امریکا او ملګرو یې له افغانستانه بېړني وتلو سره دغه هېواد ته بې وزلي او ورنی په میراث پرېښود، خو اوس د دې ټولو ملامتي پر افغان چارواکو اچوي.
نوموړي پرون جنیوا کې غونډې ته وویل، امریکا امریکا له افغانستان سره بشري مرستې هم له طالبانو په سیاسي امتیازونو ترلاسولو پورې تړلې دي.
د هغه په خبره، امریکا د افغانستان څو میلیارد ډالري شتمني هم کنګل کړې ده.
دغه روسي ډيپلوماټ دا هم وویل، چې مسکو له طالبانو سره تماس کې دی او ترې غواړي چې د ټولګډونه اداري سیستم جوړولو برخه کې خپله ژمنه پر ځای کړي.
ښاغلي ستروګانوف زیاته کړه چې روسیه په افغانستان کې د امن او ټیکاو پیاوړتیا هڅو زیاتولو ته لومړیتوب ور کوي، ځکه چې افغانستان کې سوله د سیمې د پرمختګ یوازنۍ لار ده.
ورته مهال د طالبانو تر کنټرول لاندې باختر اژانس راپور ورکړی، چې په پروان ولایت کې د بارانونو د ورېدو له امله لسګونه کورونه ویجاړ شوي او یوشمېر څاوري هم تلف شوي دي.
په پروان کې د طالبانو د طبیعي پېښو پر وړاندې د مبارزې د چمتوالي ریاست مسوولینو ویلي، چې د دغه ولایت په شینوارو، جبل السراج ولسوالیو، مرکز او یوشمېر نورو سیمو کې د پرله پسې بارانونو له امله څه باندې ۷۰ کورونه ویجاړ او یوشمېر څاروي مړه شوي دي.
د دغه اژانس د یوه بل راپور له مخې، د فاریاب ولایت په یو شمېر ولسوالیو کې شاوخوا ۲ زره څاروي د واورې او یخنۍ له کبله مړه شوي دي.
له بل پلوه د طالبانو پېښو ته د رسېدنې په چارو کې د دولت وزارت وایي، چې د کب په نهمه او لسمه نېټه د ورښتونو په نوې څپه کې نهه کسان مړه شوي او دوه ټپیان دي.
د دغه وزارت ویاند په یوه ویډیویي پیغام کې ویلي، چې پېښو ته د رسېدنې چارو د رییسانو د راپورونو له مخې د واورې، بارانونو او سړې هوا له امله په کندهار، هرات، بادغیس، هلمند، سرپل، بدخشان، او جوزجان ولایتونو کې نهه کسان مړه شوي، دوه ټپیان دي او ځینې کورونه په کلي او جزوي توګه تخریب شوي دي.
خو ځینو رسنیو بیا په دغو پېښو کې د مړو شویو کسانو شمېر پنځلس تنه یاد کړی او ویلي یې دي، چې د دغې سړې څپې له امله له ۶۰۰۰ زیات څاروي په بادغیس، فاریاب، هرات، جوزجان او فراه ولایتونو کې له منځه تللي دي.