سرچينې: په هلمند کې طالبانو د پخواني نظام د ملي امنيت ښاري مدير له ۷ ملګرو سره نیولی

AP ۱۴۰۲ کب ۱۳

له هلمند څخه سرچينو افغانستان انټرنشنل – پښتو ته وویل، چې تېره ورځ طالب استخباراتو په لښکرګاه کې د مخکني نظام د ملي امنيت ښاري مدير او د یادې ادارې ۷ نور پخواني کار کوونکي نيولي دي.

د سرچينې د معلوماتو له مخې؛ دغه کسان طالبانو په لښکرګاه کې د چاپو پر مهال په بېلابېلو سیمو کې نیولي دي.

سرچينو افغانستان انټرنشنل – پښتو ته د یکشنبې په ورځ (د کب ۱۳مه) وویل، چې طالبانو په لښکرګاه ښار کې بست پوهنتون ته نږدې د جمهوري نظام د ملي امنیت ښاري مدير اغا لالی نیولی او دې ډلې د نوموړي پر کور چاپه هم وهلې ده.

اغا لالي د جمهوري نظام د نسکورېدو وروسته په همدې سیمه کې د خوراکي توکو یو دوکان جوړ کړی و.

نوموړي په لښکرګاه کې بست پوهنتون ته نږدې اوسېده او طالب استخباراتو هغه د ښار له منځه د خلکو په ګڼې ګوڼې سیمه کې له خپل دوکان څخه وړی دی.

د اغا لالي کورنۍ هم د نوموړي نیول تایید کړي دي.

سرچينه زياتوي، چې طالبانو د نوموړي ترڅنګ د ښار له بېلابېلو سیمو څخه د مخکني نظام د ملي امنيت ۷ نور کارکوونکي هم وړي دي.

سرچينې د ۷ نورو کسانو د هویت اړوند معلومات نه دي وړاندې کړي.

په هلمند کې د طالبانو استخبارات په دې اړه د معلوماتو ورکولو څخه ډډه کوی، د طالبانو ادارې د دې کسانو د نيولو لامل هم نه دی ویلی.

په افغانستان کې واک ته د طالبانو د رسېدو سره که څه هم دې ډلې د عمومي بښنې اعلان کړی؛ خو د تېر نظام ډېری نظامي چارواکي په دې فرمان باور نه لري.

دې ډلې په تېرو نږدې درېيو کلونو کې د تېر نظام ډېر سرتېري نيولي، بندي کړي، شکنجه کړي او ان وژلي یې دي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ