د امریکا پخوانی ولسمشر ډونالډ ټرمپ وايي، چې امریکا په افغانستان کې د ۸۵ میلیاردو ډالرو په ارزښت پوځي تجهیزات او د بګرام پوځي اډه پرېښې ده. ښاغلي ټرمپ وویل: "له هغه ځایه یوازې یو ساعت دا اډه لرې ده، چېرې چې چین خپلې اټومي وسلې جوړوي او اوس چین بګرام اشغال کړی دی."
د امریکا پخواني ولسمشر ډونالډ ټرمپ د شنبې په ورځ د امریکا په ورجینیا کې یوې غونډې ته ویلي، چې امریکا لېونۍ ده وویل چې امریکا لېونۍ ده، چې د افغانستان پر جګړه یې میلیاردونه ډالر ولګول.
نوموړي وویل: "که دوی د افغانستان په اړه زما خبرې اورېدلی وی؛ نو موږ به ډېر مخکې بېرته راغلي وی."
هغه وویل، چې د لوړپوړي چارواکي ملا عبدالغني برادر ته یې په تلیفوني اړیکه کې ویلي وو، چې "امریکایي عسکر ونه وژنئ او په ۱۸ میاشتو کې په افغانستان کې هېڅ امریکایي عسکر ونه وژل شو."
نوموړي د افغانستان په اړه د جوبایډن پر سیاستونو او د وتلو په ناکامې پروسې هم نیوکه وکړه او ویې ویل، چې د ویتنام پېښه په افغانستان کې هم تکرار شوه.
د تېر کال په نومبر میاشت کې ټرمپ ویلي وو، چې که ولسمشر شي، د بګرام هوايي ډګر کنټرول به بېرته تر لاسه کړي.
د طالبانو ویاند ذبیح الله مجاهد بیا ویلي وو، چې دوی به امریکا ته هېڅکله د بیا راتګ اجازه ورنه کړي.
