د طالبانو د اطلاعاتو او کلتور وزارت د خبریالانو د ملاتړ لپاره د یوه صندوق د جوړېدو خبر ورکړ. دغه وزارت یوه خبرپاڼه کې زیاتوي، چې د دې صندوق د کړنلارې د جوړېدو لپاره یو پلاوی هم ټاکل شوی دی.
د طالبانو د اطلاعاتو او کلتور وزارت نن ووېل، چې دا پرېکړه د اطلاعاتو او فرهنګ وزير خيرالله خيرخواه د رسنيو د سرغړونو د ارزونې کمېسيون په غونډه کې وکړه.
خیرالله خیرخواه په دې غونډه کې ادعا وکړه، چې طالبانو رسنیو ته اسانتیاوې برابرې کړې او د رسنیو ستونزې یې هوارې کړې دي.
نوموړي له رسنيو هم وغوښتل، چې د "ملي ګټو" او "اسلامي ارزښتونو" پر بنسټ خپلو فعاليتونو ته دوام ورکړي.
طالبان په داسې حال کې د خبریالانو د ملاتړ صندوق د جوړولو خبر ورکړ، چې دغې ډلې په تېرو دوه نیمو کلونو کې لسګونه خبریالان نیولي او د یو شمېر رسنیو فعالیتونه یې بند کړي دي.
د طالبانو له له واکمنېدو مخکې په ټول افغانستان کې کابو ۴۹۰ ټلویزیوني شبکو، راډيوګانو او ورځپاڼو فعالیتونه درلودل، چې له دې شمېر څخه ۱۴۷ ټلوېزیونونه، ۳۰۷ راډیوګانې او ۳۶ ورځپاڼې وې.
د طالبانو له واکمنېدو سره د ۷۴ ټلوېزیونونو، ۱۱۹ راډیوګانو او ۳۲ ورځپاڼو فعالیتونه بند شول.
د افغانستان د خبریالانو د ملاتړ سازمان د معلوماتو له مخې، د جمهوري ریاست پر مهال په ټولییزه توګه ۱۱۸۵۸ خبریالان او د رسنیو کارکونکي و، چې ۵۲۴۰ تنه یې ښځینه خبریالانې وې، خو اوس په ټوله کې په افغانستان کې له ۱۰۰۰ څخه کمې ښځینه خبریالانې کار کوي.
