د طالبانو د صنعت او تجارت وزیر نور الدین عزیزي د ترکمنستان پلازمېنه عشق اباد کې نن «افغان ـ ترکمن لوی نندارتون» پرانیست. طالبان په خپله اعلامیه کې وايي، د نندارتون پرانستې مراسمو کې «د دواړو هېوادونو د مسولینو او خصوصي سکتور ترڅنګ د څلویښتو هېوادونو استازو هم ګډون کړی دی.»
د نندارتون د پرانیستې مراسمو کې د طالبانو د صنعت او تجارت وزیر نور الدین عزیزي د افغانستان او ترکمنستان ترمنځ د دوه اړخیزو همکاریو پر پیاوړتیا ټینګار وکړ.
ښاغلي عزیزي بهرني پانګوال افغانستان ته د پانګونې لپاره وبلل او زیاته یې کړه، چې د طالبانو په واکمنېدو سره په دغه هېواد کې بهرنیو پانګوالو ته ښه شرایط برابر شوي دي.
نوموړي له ترکمن چارواکو هم وغوښتل چې د ترکمنستان د ارقدان ښارګوټي دویمې برخې جوړولو کې د افغانستان له اوسپنې، ګرانبیه ډبرو، رنګ او نورو توکو کار واخلي.
د طالبانو د صنعت او تجارت وزارت په اعلامیه کې راغلي چې دې نندارتون ته د ترکمنستان ولسمشرقربانقلي بردي محمدوف هم ورغلی و.
د دوی په خبره، دا لومړی ځل دی چې نوموړی ترکمنستان کې یوه بهرني نندارتون ته ځي.
طالبان په خپله اعلامیه کې د ښاغلي محمدوف په حواله وايي، چې له افغانستان سره د خپلمنځي همکارۍ د زیاتوالي لپاره یې خپلو چارواکو ته په مختلفو اقتصادي، ټرانزیټي او تجاري برخو کې د پرلپسې ناستو سپارښتنه وکړه.
طالبانو په افغان- ترکمن لوی نندارتون کې د افغانستان د سوداګرو توکي نندارې ته وړاندې کړي دي، خو دې ډلې دا نه دي ویلي چې دغه نندارتون به څو ورځې روان وي.
ایراني چارواکي وايي، د پخواني ولسمشر اشرف غني په واکمنۍ کې د کمال خان بند جوړېدو سره اوس اوبه د ایران پر ځای نمیروز کې د ګودزره شاړو ته ځي.
دوی بیا بیا طالبان تورنوي چې ایران ته د اوبو پرېښودلو خنډ دي، خو طالبان تل وايي چې د وچکالۍ له امله اوبه ایران ته نه ځي او کله چې بارانونه وشي اوبه به تر ایران ورسېږي.
په افغانستان کې د وروستیو اونیو ورښت پسې چې له پرون راهیسې له کمال خان بند ایران ته اوبه رسېدلې اوس د دغه هېواد رسنۍ هم پر دې اوبو شک ښيي.
د ایران سپاه پاسدران ته نږدې تسنیم خبري اژانس د یوه راپور په خپرولو سره ویلي، په ټولنیزو رسنیو کې د ایران خوا ته د اوبو تللو خپره شوې ویډیو ښيي، چې په افغانستان کې د سېلابونو خړه ایران ته رسېدلې ده.
د تسنیم خبري اژانس خبریال د خپلو موندنو پر بنسټ وایي، چې د افغانستان په سیندیزه حوزه هلمند کې د ورښت د زیاتوالي له امله د کمال خان بند اوبه ډېرې شوې دي، چې له امله یې د سېلابونو خړه ایران ته رسېدلې ده.
خو د سيستان او بلوچستان د چاپېريال ساتنې عمومي رييس محمد رضا علیمرادي وايي، د اوبو د خوشې کېدو بهیر تېره شپه پیل شوی او په افغانستان کې د ورښتونو د زیاتوالي له امله به په راتلونکو ورځو کې هم دوام وکړي.
خو نوموړی زیاتوي، دا خوشې شوې اوبه د ايران او افغانستان ترمنځ د اوبو د تړون پر بنسټ نه دي، بلکې يوازينى هوکړه ليک د کمال خان بند د دروازو پرانېستل دي، تر څو د ګوډزره دښتې پر ځای ایران ته وبهیږي.
که څه هم د ایران تسنیم خبري اژانس دا اوبه «خړه» بولي، خو ښاغلی علیمراديیې خوږې اوبه بولي او زیاتوي هامون ډنډ ته یې نه پرېږدي ځکه د څښاک اوبو برابرولو کې ډېره مرسته کوي او سیستان بلوچستان له وچکالۍ ژغورلی شي.
ايران ته د اوبو رسېدو خبر په داسې مهال دی چې نیمروز کې طالبان وايي، له تېرو څو کلونو وروسته یو ځل بیا لښکري کانال د دغه ولایت تر مرکز زرنج پورې اوبه ورسولې.
دوی وايي، د ډېر ورښت او د دې کانال پاکولو پسې له کمال خان بند تر زرنج د اوبو بهېدل پیل شوي چې له مخې به یې تر اتیا زره جریبه کرنیزه ځمکه خړوبه شي.
په سیمه کې سرچینو بیا افغانستان انټرنشنل- پښتو ته وویل، چې دا وبه د باران له امله دي او کمال خان بند کې د اوبو په کمېدو سره به لښکري کانال بېرته وچ شي.
