د طالبانو ستره محکمه وايي، په هلمند کې یې څلور تنه د «غلا، لواط او نامشروع اړېکو» په تور په عام محضر کې په سزا رسولي. دغه محکمه زياتوي چې دغه څلور تنه د هلمند ولایت د ښاري لومړۍ محکمې له لوري محکوم شوي وو.
د طالبانو سترې محکمې نن پنج شنبه د (کب ۱۷مه) په ایکس پاڼه لیکلي، دغو کسانو چې د بند لنډه موده یې بشپړه کړې وه په عام محضر کې په سزا ورسېدل.
د طالبانو په وړاندې شویو معلوماتو کې د سزا د څرنګوالي په اړه څه نه دي ویل شوي، خو زیاته کړې یې ده چې دغو کسانو ته تعزیري سزا ورکړل شوې ده. دا ډله معمولا په داسې قضیو کې تورن کسان په دورو وهي.
د طالبانو د سترې محکمې د معلوماتو له مخې، دغو کسانو ته د هلمند ولایت د اوسېدونکو، د دغه ولایت د محکمې د چارواکو او نورو طالب مسوولانو په حضور کې سزا ورکړل شوه.
واک ته د طالبانو له رسېدو وروسته دغې ډلې جسمي سزاګانې بیا پیل کړې، خو په دې وروستیو کې د دغې ډلې چارواکو د وهلو ټکولو، د لاسونو پرې کول او اعدام په څېر جسمي سزاګانې ډیرې کړې دي.
تېره ورځ د طالبانو ستره محکمې ویلي و چې، په ميدان وردګو او کابل کې يې د دوو ښځو په ګډون ۱۱ تنه د «زنا، فحشا، غلا او بې حيايۍ» په تور په عام محضر کې په سزا رسولي.
په دې وروستیو کې ملګرو ملتونو په افغانستان کې د جسمي مجازاتو د دوام په اړه اندېښنه څرګنده کړې او له طالبانو یې غوښتي چې د جسمي مجازاتو چې د انساني کرامت خلاف او ظالمانه عمل دی مخه ونیسي.
خو د طالبانو ډلې ویلي چې اسلامي شریعت پلي کوي او بهرني هېوادونه او سازمانونه دې د افغانستان په کورنیو چارو کې لاسوهنه نه کوي.
د کډوالو په چارو کې د ملګرو ملتونو عالي کمېشنرۍ (يو این ایچ سي ار) دفتر نن پنج شنبه د (کب ۱۷مه) په خپله ایکس پاڼه لیکلي چې دغه ښوونځی یې هغو ځوانو زدهکوونکو ته جوړ کړی چې له دې وړاندې یې په یوه کرايي کور کې له څوکیو او مېزونو پرته زدهکړې کولې.
دغه دفتر وايي، یاد ښوونځی په لمرېزه برېښنا سمبال دی، او له لومړنیو اسانیاو برخمن دی، چې په دې سره به د زدهکړو بهیر په دغې سیمه کې وغوړيږي او د دې چارې مثبتې پایلې به څرګندې شي.
د کندهار لپاره د طالبانو د اطلاعاتو او کلتور ریاست مشر د دغې ډلې تر واک لاندې ملي ټلویزیون ته ویلي، چې د کندهار ښار د مرکز په نهمه ناحیه کې د ۳۱۷زره ډالرو په لګښت د یوه ښوونځي د ودانۍ جوړولو چارې بشپړې او ګټې اخیستنې ته سپارل شوی.
د دغه ریاست چارواکو زیاته کړې چې په ۱۶ درسي ټولګیو کې ۱۱۰۰ زدهکوونکو ته د زدهکړو زمینه برابره شوې.
د کندهار ځايي طالب چارواکي وايي یاد ښوونځی د نهو میاشتو په موده کې جوړ شوی، چې د ۱۶ درسي خونو په لرلو سره به په کې دوه وخته ۱۱۰۰ نجونې او هلکان زده کړې کوي.
د دغه ښوونځي د جوړولو او پرانیستې خبر داسې مهال ورکول کیږي چې په افغانستان کې واک ته د طالبانو له رسېدو وروسته له شپږم ټولګي پورته د نجونو پر زدهکړو د بندیز ۹۰۰ ورځې پوره شوې او دغه ډله وايي چې تر شپږم ټولګي پورته یې د نجونو پر زدهکړو ځکه بندیز لګولی چې د دوی لپاره د زدهکړو نوې تګلاره جوړوي خو دغه تګلاره د ۹۰۰ ورځو په تېرېدو لا هم نه ده بشپړه شوې.
