ملاله یوسفزۍ: نړۍوالې ټولنې د طالبانو له خوا د افغان ښځو ځورول جدي نه دي نیولي
د سولې د جایزې تر ټولو ځوانه ګټونکې او د نجونو د زده کړو فعاله ملاله یوسفزۍ وايي، چې د افغان ښځو په وړاندې د طالبانو سیاست محاسبه شوی او دا ډله پوهیږي چې څه وکړي.
د سولې د جایزې تر ټولو ځوانه ګټونکې او د نجونو د زده کړو فعاله ملاله یوسفزۍ وايي، چې د افغان ښځو په وړاندې د طالبانو سیاست محاسبه شوی او دا ډله پوهیږي چې څه وکړي.
هغې په یوې ناسته کې ویلي، چې نړۍوالې ټولنې په افغانستان کې د ښځو پر وړاندې د زور زیاتي موضوع ته د پام وړ توجه نه ده کړې.
د نجونود زده کړو د حقونو دغې فعالې د جمعې په ورځ د مارچ اتمې په مناسبت هغې غونډې ته چې په کې د ښځو د حقونو د یو شمېر مخکښو فعالانو هم حضور درلود، وویل، چې د ښځو پر وړاندې د طالبانو سیاست موقتي نه دی، بلکه ډېر په دقت سره محاسبه شوی سیاست دی.
اغلې یوسفزۍ پر نړیوالې ټولنې تور ولګاوه چې د افغان ښځو د حقونو موضوع په یوه توګه له پامه غورځوي. هغې وویل: «داسې ښکاري چې دا نړیوالې ټولنې ته ډېره مهمه مساله نه ده. زما په اند دا یوه ډیره مهمه مساله ده، البته که غواړو طالبان او د هغوی ایډیولوژي وننګوو.»
د نوبل د سولې جایزې تر ټولو ځوانې ګټونکې، چې د ښوونځي په دوره کې په ۲۰۱۲ میلادې کال کې د پاکستانې طالبانو له خوا په برید کې ټپې شوې وه، وايي، چې طالبانو نه یوازې د نجونو ماشومتوب، بلکې د دوی راتلونکی یې هم ترې اخیستې ده.
هغې زیاته کړه: «طالبانو له تعلیم څخه د نجونو په محرمولو د هغوی راتلونکی هم ترې اخیستی.»
د اغلې یوسفزۍ په وینا افغانستان په نړۍ کې یوازینی هېواد دی چې نجونې پکې خپلې زده کړې نه شي بشپړولای. د ښځو او نجونو د حقونو دغې فعالې زیاته کړه چې د افغان ښځو او نجونو تر څنګ ولاړ ده او د هغو ښځینه فعالانو ستاینه یې وکړه چې د افغانستان د راتلونکي لپاره یې خپل ژوند له خطر سره مخامخ کړی دی.
په دې غونډه کې د ښځو د حقونو افغان فعالې نایره کوهستانۍ چې په کابل کې د لاریونونو د تنظیمولو په تور نیول شوې وه او د ښځو د حقونو یو شمېر نورو فعالانو هم خبرې وکړې.
"په افغانستان کې د جنسیتي تبعیض په اړه بحث" تر سرلیک لاندې، ګډونوالو د ښځو او نجونو د حقونو د خرابېدونکي وضعیت، جنسي تاوتریخوالي او د جنسیتي توپیر په اړه خبرې وکړې.
د ۲۰۲۱ اګست میاشتې راهیسې چې طالبان بیا ځلې افغانستان کې واک ته رسیدلي، دې ډلې د ښځو او نجونو د حقونو پر محدودولو په موخه ۸۵ فرمانونه صادر کړي دي.
