د کاناډا د کډوالۍ او پناه غوښتنې ادارې په اېکس پاڼه خبر ورکړی، چې تېره ورځ یې له پاکستانه په یوې چارټر الوتکه کې ۳۳۳ افغانان کلګري ته ولېږدول. دغه اداره وایي، د ۲۰۲۱ کال اګسټ میاشتې راهیسې یې تر دې دمه ۴۹۰۷۰ افغانان کاناډا ته لېږدولي دي.
دغې ادارې لیکلي، کاناډا د ۲۰۲۱ کال له اګست میاشتې راهیسې ۴۰،۰۰۰ کډوالو او زیان منونکو افغانانو د هرکلي په موخه خپل هدف پوره کړی او د نورو غوښتنلیکونو د څېړلو کار لاهم دوام لري.
دغه اداره زیاتوي، موږ د څو ځانګړو پروګرامونو له لارې له ۴۰،۰۰۰ څخه زیات زیان منونکي افغانان کاناډا ته لېږدولي.
دغه اداره وایي:« موږ به د هغو غوښتنلیکونو ارزونې ته دوام ورکړو، چې د ټولو ځانګړو پروګرامونو له لارې د افغانانو لپاره د لومړیتوب له مخې مو ترلاسه کړي دي.»
لاهم په سلګونه کورنۍ د طالبانو له بیا واکمنېدو وروسته په پاکستان کې د خپلو غوښتنلیکونو د څېړلو بهیر ته په تمه دي.
له بل پلو دوه ورځې وړاندې رویټرز راپور ورکړی و، چې د امریکا د کډوالۍ ځانګړی پروګرام «اېس ای وي» د هغو افغانانو لپاره چې د متحده ایالاتو له حکومت سره یې کار کاوه د روان میلادي کال تر وروستیو میاشتو به ودرېږي.
تر دې وړاندې د کانګرس لهخوا د ۳۸زره او ۵۰۰ ځانګړي کډوالۍ ویزې (اېس ای وي) د ورکړې اجازه ورکړل شوې وه، چې اوسمهال یوازې ۸۰۰۰ ویزې یې پاتې دي.
