شهباز شریف د پاکستان ولسمشر زرداري ته د نوې کابینې د غړو نوملړ استولی دی

د پاکستان انصاف غورځنګ ګوند په ټاکنو کې د وروستيو پايلو پر ضد د لاريونونو لپاره پر خپلو پلويانو غږ کړی، چې په شویو درغلیو دې چوپ نه پاتې کیږي.

د دې خبر له مخې، د عمران ګوند اړوند وکيلانو او مشرانو په اسلام اباد، لاهور، کراچۍ او پېښور کې د وروستيو ټاکنو د پايلو پر ضد غوښتل لاريونونه تر سره کړي.

پاکستاني جيو نيوز ټلویزیون هم اعلان کړی، چې پوليسو په لاهور ښار کې د تحریک انصاف ګوند دوه لوړپوړي مشران نيولي دي.

د عمران خان ګونډ په ټاکنو کې د درغليو ادعا کوي او په پاکستان کې اوسنۍ واکمنه ډله د ټاکنو کمېسیون سره د همکارۍ په لاس لرلو تورنوي.

د دې ګوند پارلماني غړو په وروستيو ورځو کې د قومي اسمبلۍ په عمومي غونډه کې د عمران د عکسونو په لرلو د هغه د خلاصون غوښتنه وکړه.

عمران خان د ۱۳۹۷ کال څخه تر ۱۴۰۱ کال د وري مياشت پورې د پاکستان لومړۍ وزير و.

نوموړی له همدې کال د اوړي راهيسي د مالي، سياسي او امنيتي فساد په ګڼو فضيو کې د لاس لرلو له امله په زندان کې دی.

شهباز شريف تېره اونۍ د پاکستان د پارلمان د رايو په اکثريت سره د دغه هېواد د ٢٤م لومړي وزير په توګه وټاکل شو.

هغه د خپلې لومړۍ وينا؛ پر مهال مخالفو ډلو ته بلنه ورکړه، چې د هېواد د کورنيو کړکېچونو او ستونزو په حل کې دې ورسره برخه واخلي.

شریف په ​​پاکستان کې د وروستيو ټاکنو د پايلو پر ضد د لاریون کوونکو استازو ته په خطاب کې وويل، چې په هېواد کې د سرغړونو د مخنيوي لپاره عدالتونه او ادارې فعالې دي او لاریون کوونکي ګوندونه په ازاده توگه خپل مسايل وړاندي کولی شي.

د لوړې په مراسمو کې لومړي وزیر شهباز شريف، پخواني ولسمشر عارف علوي، د مسلم ليګ نون مشر نواز شريف، د قامي اسمبلۍ مشر اياز صادق، بلاول بوټو او یو شمېر نورو سیاستوالو ګډون کړی و.

دا په د پاکستان په تاریخ کې لومړنی سیاسي شخص وي، چې د دویم ځل لپاره ولسمشر ټاکل کیږي، نوموړی په ۲۰۰۸ کال کې هم د پاکستان ولسمشر ټاکل شوی و.

تېره ورځ اصف علي زرداري ۴۱۱ ټاکنیزې رایې خپلې کړې او د هغه سیال محمود خان اڅکزي چې د سني اتحاد شورا له خوا نومول شوی و ۱۸۰ ټاکنیزې رایې ترلاسه کړې وې.

په پاکستان کې د فېبروري د ټاکنو له پیله تر اوسه په دغه هېواد کې ټاکنیزې ناندرې روانې دي او بېلابېل اړخونه په تېرو ټاکنو کې د درغلیو د کېدو خبره کوي.

د پاکستان رسنۍ ډان خبر ورکړی، چې دغه دوه وروڼه د جمعې په ماښام (د کب ۱۸مه) په یوه هدفي برید کې وژل شوي دي.

د پاکستان د پولیسو یوه چارواکي شفیق صدیقي رسنیو ته ویلي، چې د دغه برید قربانیان په سهراب ګوټ کې اوسېدل.

د دغه پاکستاني چارواکي په وینا دوو افغان وروڼو غوښتل د واده د مراسمو لپاره موټر کرایه کړي؛ چې د دوو موټرسایکل سپرو له خوا پرې برید وشو.

پولیسو رسنیو ته ویلي، چې ښايي دا برید د دې کسانو د لوټلو لپاره شوی وي.

د راپورونو له مخې د پېښې د قربانیانو جسدونه د معایناتو لپاره روغتون ته وړل شوي دي.

ډان ورځپاڼې د "عيني شاهدانو" له خولې ليکلي، چې ظاهرا بریدګر هم افغانان وو. پاکستاني پولیسو ویلي، چې په دې اړه یې پلټنې پیل کړې دي.

د طالبانو کډوالو او راستنېدونکو چارو وزارت نن یکشنبه د (کب ۲۰مه) په ایکس پاڼه د ننګرهار ولایت د تورخم سرحدي امریت له قوله لیکلي چې ۲۷ کورنۍ چې د غړو شمیر یې ۱۴۲ تنه کیږي په جبري توګه هېواد ته راستنې شوې.

د وزارت د معلوماتو له مخې دغه شمېر کډوال وړمه ورځ د کب په ۱۹مه هیواد ته راستانه شوي.

د دغه وزارت په وینا، دغه کډوال تر ثبتېدو وروسته د مرستو ترلاسه کولو په موخه د ملګرو ملتونو عالي کمېشنرۍ او د کډوالۍ نړېوال سازمان ته ورپېژندل شوي دي.

تېره اوونۍ د پاکستان دولتي راډیو خبر ورکړی و چې؛ افغانستان ته د افغان کډوالو د پلان له پلي کېدو راهیسې پنځه لکه، درې زره او ۷۲۱ افغان کډوال په جبري ډول افغانستان ته ستانه کړل شوي.

د طالبانو کډوالو او بېرته ستنېدونکو چارو وزارت تېره ورځ شنبه ‏د ننګرهار د تورخم سرحدي امریت د معلوماتو له مخې خبر ورکړی و، چې ۴۷۱ تنه افغان کډوال د کب پر ۱۷مه په جبري توګه له پاکستانه ستانه کړل شوي.

که څه هم د پاکستان مخکني لومړي وزیر انوارالحق کاکړ ویلي و، چې د کډوالو پر وړاندې دغه پرېکړه سمه وه او راتلونکی حکومت باید دغه لړۍ روانه وساتي. خو د شهباز شریف په مشرۍ نوي راغلي حکومت لا په دې اړه څه نه دي ویلي چې د کډوالو په زور ایستلو لړۍ به روانه ساتي او که بدلون به پکې راولي.

په پېښور کې پولیسو نن یکشنبه د (کب ۲۰مه) افغانستان انټرنشنل پښتو څانګې ته منلې چې د پېښور په بورډ بازار کې د ریکشاوو په تمځای کې په موټر سایکل کې د چاودېدونکو توکو د چاودنې له امله دوه تنه وژل شوي او یو تن ټپي دی.

پولیس وايي، دغه برید د پېښور پر وخت د سهار په اووه بجې شوی، چې په دغه سیمه کې ګڼې ګوڼه لږه وي.

پولیس وايي، کیدای شي دا یو ځانمرګی برید وي خو وايي اوس لا څیړنې روانې دي چې معلومه کړي دا پېښه څنګه شوې او هدف یې څه و.

پېښور کې پولیس وايي، په سیمه کې یې چانیز عملیات هم پیل کړي او هڅه کوي چې په دې اړه نور معلومات راټول کړي.

د دغه برید مسوولیت لا چا نه دی منلی.

ويل کیږي، چې نن له غرمې وروسته په پېښور کې د پاکستان تحریک انصاف عمران خان ګوند له لوري په ترسره شویو ټاکنو کې د شویو درغلیو په غبرګون کې یوه لویه غونډه جوړه کړي چې د عمران خان د ګوند ایالتي مشر او د خیبرپښتونخوا لپاره نوی ټاکل شوی اعلی وزیر علي امین ګنډاپور به هم پکې ګډون وکړي.

دا په تېرو وروستیو میاشتو کې په پېښور کې د خپل ډول لومړنۍ چاودنه ده چې کیږي.

تېر کال پر پاکستاني پولیسو د ځانمرګو او سړک غاړې بمي چاودنو څو پېښې شوې چې پولیسو ته یې مرګ ژوبله اړولې وه.