د طالبانو رییس الوزرا ملا محمد حسن د روژې میاشتې په مناسبت په پیغام کې ویلي، چې غزه اوسمهال د اسراییل له «سخت ظلم او وحشت سره مخ ده او هغه څه چې په غزه کې روان دي د تاریخ د بشریت پر مخ تور داغ«» دی.
رییس الوزرا د دوشنبې په ورځ د ( کب ۲۱مه) له نړېوالو سازمانونو او اسلامي هېوادونو وغوښتل څو د غزې د خلکو ملاتړ وکړي.
ملا محمد حسن پر غزې د پېښو د مخنیوي په برخه کې د نړۍ په چوپتیا نیوکې وکړې او ویې ویل: «هغه څه چې په غزه کې تېریږي د بشریت د تاریخ پر مخ تور داغ دی.»
سره له دې چې طالبانو په ځلونو پر غزې د اسراییلو بریدونه غندلي، خو یو شمېر هېوادوال بیا پر طالبانو نیوکې کوي چې لومړی باید د افغانستان د خلکو وضعیت په پام کې ونیسي.
اخوا د طالبانو د کورنیو چارو وزیر سراج الدین حقاني هم د لیندۍ په میاشت کې د غزې جګړې ته په اشارې سره ویلي و، چې د فلسطین له خلکو سره مرسته به د افغانستان د خلکو ستر ویاړ وي.
د افغانستان لپاره د ایران استازی حسن کاظمي قمي چې له طالبانو سره نږدې اړیکې لري، مخکې ویلي و چې د اړتیا په صورت کې به د ځانمرګو بریدګرو یو لښکر د غزې په ملاتړ له افغانستان څخه ولاړ شي.
دا په داسې حال کې ده، چې د غزې د عامې روغتیا وزارت وایي چې په تېرو پنځو میاشتو کې نږدې ۳۱ زره کسان په غزه کې وژل شوي دي، چې دوه اویا سلنه برخه یې ښځې او ماشومان جوړوي.
د اسراییل لومړی وزیر بنیامین نتنیاهو بیا وایي، چې په وژل شویو کسانو کې ۱۳ زره یې د حماس جنګیالي دي.
