د طالبانو د اطلاعاتو او کلتور وزارت ویلي دي، چې د دغې ډلې ځايي چارواکو په اروزګان کې خصوصي رسنۍ څارلي دي او دغه وزارت له رسنیو غواړي، چې د دوی د نظام په ملاتړ خپرونې وکړي.
د طالبانو د اطلاعاتو او کلتور وزارت د سې شنبې په ورځ (د کب ۲۲مه) په یوه خبرپاڼه کې لیکلي، چې د دې ډلې چارواکو د ملي راډیو تلویزیون، اونیزو ورځپاڼو، یوې غږیزې رسنۍ او شپږ تصویري رسنۍ څارلي دي.
د خبرپاڼې له مخې؛ په اروزګان کې د طالبانو د اطلاعاتو او کلتور رییس ولي قریشي د رسنیو له مسوولانو غوښتي، چې خپل پروګرامونه د روژې له میاشتې سره سم جوړ او خپاره کړي.
دغه طالب چارواکي د رسنيو له مسوولانو غوښتي، چې د خپلو کارکوونکو معلومات له طالب چارواکو سره شريک کړي.
دا په داسې حال کې ده، چې طالبانو په تېرو دوه نیمو کلونو کې په افغانستان کې د رسنیو پر فعالیتونو ډېر محدودیتونه لګولي دي.
د راپورونو له مخې؛ طالبان د رسنیو د خپرونو محتوا له خپرېدو مخکې ګوري.
په موسيقۍ، ټلويزيوني پروګرامونو کې د ښځو پر حضور او د تفريحي پروګرامونو بنديزونه هغه څه دي، چې طالبانو رسنۍ دې ته اړ کړي؛ ترڅو دغه مقررات ومني.
