د امریکا استخباراتي ادارو خبرداری ورکړی چې دغه هیواد په بې ساري ډول د «ماتېدونکي نړېوال نظم» سره مخ دی. دغو بنسټونو د امریکا سنا ته په یوه راپور کې ویلي، چې چین، روسیې، ایران او نورو سیمه ییزو لوبغاړو نړیوال نظام او د امریکا لومړیتوبونه ننګولي دي.
د ۲۰۲۴ د ګواښونو د ارزونې راپور چې د دوشنبې په ورځ خپور شو پکې راغلي: «یو هوښیار خو اندېښمن چین، یوه دښمنه روسیه او ځینې سیمه ییز قدرتونه لکه ایران او نور پیاوړي نا دولتي لوبغاړي د نړېوال سیسټم اوږدمهاله مقررات او په دې سیسټم کې د امریکا مشري ننګوي.»
په دغه راپور کې پر چین او روسیې تمرکز شوی او ویل شوي چې چین په ورته وخت کې چې په اوکراین کې جګړه پیل شوې، د روسیې د صنعتي بنسټونو په ملاتړ روسیې ته اقتصادي او امنیتي مرستې ورکړې دي.
د امریکا د ملي استخباراتو مشر اپریل هینس له قانون جوړونکو څخه وغوښتل چې اوکراین ته نورې زیاتې پوځي مرستې تصویب کړي. هغه اندېښنه وښوده چې د اسراييلو او حماس ترمنځ په غزه کې شخړه ښايي نړيواله ناامني خپره کړي.
هینس وویل: «د غزې کړکېچ د دې یوه څرګنده بېلګه ده چې څنګه سیمه ییز پرمختګونه له پراخو قوي پیغامونو سره را روان دي، او ان په نړیوال کچ.»
هغه د حوثي وسله والو له لوري پر کښتیو بریدونو ته اشاره وکړه او ویې ویل چې القاعدې او داعش ډلو «له حماس په الهام اخیستنې» خپلو ملاتړو ته امر کړی چې د اسراییلو او امریکا پر ګټو بریدونه وکړي.
