رحمت الله نبیل: د افغانستان برخلیک باید د ملي اجماع له لارې وټاکل شي
د افغانستان د ملي امنیت پخواني مشر رحمت الله نبیل په پاریس کې د افغان سیاسي فعالانو په غونډه کې وویل، چې د افغانستان برخلیک باید د ملي اجماع له لارې وټاکل شي.
د افغانستان د ملي امنیت پخواني مشر رحمت الله نبیل په پاریس کې د افغان سیاسي فعالانو په غونډه کې وویل، چې د افغانستان برخلیک باید د ملي اجماع له لارې وټاکل شي.
رحمت الله نبیل په دې ناسته کې ټینګار وکړ، چې د خلکو په ځانګړې توګه د ښځو پر وړاندې د طالبانو چلند نړۍوالې ټولنې ته ننګ دی.
د افغانستان د ملي امنیت پخواني رییس په دې ناسته کې وویل: «د واکمنو ذهنیت دا دی چې په افغانستان کې د ملي اجماع له ترلاسه کولو مخکې یو ډول نړۍوالې اجماع ته اړتیا ده، په داسې حال کې چې د دغه هېواد برخلیک باید د ملي اجماع له لارې وټاکل شي.»
د افغان سیاستوالو غونډه د چهارشنبې په ورځ (د کب ۲۳مه) د فرانسې په پارلمان کې جوړه شوه.
رحمت الله نبیل په خپلو خبرو کې د سیمې د هېوادونو او د نړۍ د سترو قدرتونو ترمنځ د افغانستان لپاره د تلپاتې حل لارې په اړه یوې هوکړې ته رسېدل ستونزمن وبلل.
ښاغلي نبیل ټینګار وکړ، چې د هېواد ستونزې ته د حل لارې موندلو په بهیر کې د افغانانو د رول په پام کې نه نیول، د دوحې د پروسې د ناکامۍ لامل دی.
ښاغلي نبیل زیاته کړه چې د دوحې پروسه د افغانانو په زیان ختمه شوه.
رحمت الله نبیل وویل: «د دې هېواد د اوسېدونکو په توګه دا زموږ مسوولیت دی، چې د یوه نوي ټولنیز تړون د لاس ته راوړلو هڅه وکړو او د یوې شفافې او ډېموکراتیکې پروسې پر بنسټ له داخلي ننګونو سره مقابله وکړو او د دغه تاریخي مسوولیت بار د نورو په اوږو وانه چوو.»
په سیمه کې د سولې او جګړې په اړه د افغانستان د جیوپولټیک دریځ د اغیزو په اړه د افغان سیاستوالو غونډه د افغانستان د سولې د خبرو اترو د بنسټ په همکارۍ جوړه شوې وه.
په دې غونډه کې ګڼ شمېر سیاسي شخصیتونو، پخوانیو افغان چارواکو، مدني فعالانو او فرانسوي شخصیتونو برخه اخیستې وه.
