د کابل په ښار کې له چاودنې وروسته د ملي مقاومت جبهې اعلان وکړ چې د کابل سرینا هوټل ته څېرمه یې د طالبانو پر یوې پوستې یې برید کړی، چې پکې پنځه تنه طالبان وژل شوي او د دغې ډلې دوه تنه نور غړي ټپيان شوي دي.
تر دې مخکې سیمه ییزو سرچینو د کابل ښار په مرکز کې د یوې نسبتاً زورورې چاودنې د رامنځته کېدو خبر ورکړی و. یوې سرچینې ویلي، چې طالبانو په هغه سیمه کې لاره د ترافیکو پر مخ تړلې، چې چاودنه شوې ده.
د ملي مقاومت جبهې د دغه برید د نوعیت په اړه جزییات نه دي ورکړي.
د مقاومت جبهې په اعلامیه کې راغلي، چې دا برید د پنجشنبې په ورځ (د کب ۲۴مه) په ځايي وخت د ماښام په اوو بجو وشو.
د دغې جبهې د معلوماتو له مخې؛ په دې بريد کې د دوى ځواکونو او ملکي وګړو ته زيان نه دى اوښتى.
طالب چارواکو د دغه برید او خپلو ځواکونو ته د اوښتې مرګ ژوبلې په اړه څه نه دي ویلي.
سرینا هوټل د پلازمینې یو له مصروفو سیمو څخه ده او د طالبانو تر سختو تدابیرو لاندې دی.
د ملي مقاومت جبهې چې په وروستیو ورځو کې یې د طالبانو پر ضد خپلو بریدونو ته زور ورکړی، وايي چې په تېرو دوو ورځو کې یې د کابل ښار په ۱۵مه، ۱۷مه، پنځمه او دویمه امنیتي حوزو کې د طالبانو پر پوستو بریدونه کړي، چې په پایله کې یې طالبانو ته مرګ ژوبله اوښتې ده.
