د پاکستان لومړي وزیر شهباز شریف د سعودي له ولیعهد محمد بن سلمان بیا وغوښتل چې اسلام اباد ته په رسمي سفر ور شي. دا غوښتنه په هغو ټلیفوني خبرو کې شوې چې محمد بن سلمان نن د شهباز شریف د بیا ټاکل کېدو د مبارکۍ لپاره کړی و.
شهباز شریف په خپل تېر لومړي وزارت کې هم ښاغلي بن سلمان ته د پاکستان د لیدو بلنه ور کړې وه.
د پاکستان چارواکي هیله من وو چې د ۲۰۲۲ کال نومبر کې به نوموړی اسلام اباد ته ور شي او له پاکستان سره به اقتصادي مرسته اعلان کړي، خو محمد بن سلمان دا سفر وځنډاوه.
د پاکستان دولتي رادیو وايي، شهباز شریف په خپلو خبرو کې بیا سعودي ولیعهد د اسلام اباد د لیدو بلنه ور کړه او زیاته یې کړه چې د دغه هېواد وګړي د نوموړي هرکلي ته منتظر دي.
دا رسنۍ وايي، محمد بن سلمان هم له لومړی وزیر سره خبرو کې له اسلام اباد د پوره ملاتړ ژمنه کړې ده.
محمد بن سلمان په دې خبرو کې ویلي، چې دواړه هېوادونه د ورورلۍ نږدې اړیکي لري.
