په پکتيکا او خوست کې د پاکستان له هوايي او په ډنډپټان کې د طالبانو له ځوابي بریدونو څلور ورځې وروسته په اسلام اباد کې د طالبانو سفير سردار احمد شکېب د افغانستان لپاره د پاکستان له ځانګړي استازي اصف دوراني سره وکتل.
سرچینې وایي، د طالبانو سفیر تر اوسه نه دی توانیدلی چې د پاکستان د بهرنیو چارو له وزیر محمد اسحاق ډار سره وګوري.
په پاکستان کې د طالبانو سفارت نن په یوه خبرپاڼه کې لیکلي چې سردار احمد شکېب او اصف دوراني د افغانستان او پاکستان ترمنځ د وروستیو ستونزو، د سیاسي او سوداګریزو اړیکو پر بیا رغولو خبرې وکړې.
دغه سفارت د خبرو نور جزییات نه دي خپاره کړي.
د دوشنبې په سهار(د کب ۲۸مه) د پاکستان هوايي ځواکونو په پکتیکا او خوست بریدونه وکړل.
له هغه وروسته د پاکستان د بهرنیو چارو وزارت په یوه بیان کې افغان طالبان له تحریک طالبان پاکستان څخه د وسیلې په توګه په کار اخیستو تورن کړل او ویې ویل چې په افغانستان کې هوايي بریدونه د ترهګرۍ ضد عملیات وو.
د طالبانو د بهرنیو چارو وزارت هم په کابل کې د پاکستان سفیر عبیدالرحمن نظاماني احضار کړ.
د طالبانو وياند ذبيح الله مجاهد وايي، چې په پکتيکا کې د پاکستان په هوايي بريد کې درې ښځې او درې ماشومان او په خوست کې د يوې کورنۍ درې غړي وژل شوي دي.
طالبانو د پاکستان د بریدونو په غبرګون کې د پکتیا په ډنډ پټان ولسوالۍ کې له ډیورنډ کرښې سره د پاکستان سرحدي پوستې په نښه کړې.
