د پاکستان لومړي وزیر شهباز شریف د مسکو برید غندلی او یو وحشیانه عمل یې بللی دی. د روسیې دولتي رسنۍ وايي، تر دې دمه د مسکو څنډه کې پر کنسرټ د پروني برید د وژل شویو شمېر ۱۴۳ او د ټپیانو ۱۴۰ ته رسېدلی. داعش د دغه برید مسوولیت منلی او د ښکېلو ۴ کسانو انځورونه یې هم خپاره کړي دي.
بلخوا کرملین اعلان وکړ، چې د مسکو په څنډه کې په یوه کنسرت باندې د برید په تړاو د څلورو "ترهګرو" په ګډون ۱۱ تنه نیول شوي دي.
د کرملین د خبر له مخې د روسیې د امنیتي خدماتو رییس الکساندر بورتنیکوف د دغو کسانو د نیول کېدو راپور ولادیمیر پوتین ته سپارلی دی.
د شنبې په ورځ روسي رسنیو داسې ویډیوګانې خپرې کړې، چې په کې د دغه هېواد خلک د طبي مرکزونو مخې ته په کتار کې لیدل کېږي، چې د مسکو په څنډه کې د برید ټپیانو ته وینه ورکړي.
که څه هم داعش د دې برید مسوولیت منلی، خو مسکو لا په دې تړاو پر کومه ډله تور نه دی پورې کړی.
داعش ته نږدې اعماق رسنۍ نن د هغو څلورو کسانو انځورونه هم خپاره کړي، چې په دې برید کې یې ښکېل بولي.
د مسکو له برید وروسته د قزاقستان ولسمشر د امنیتي تدابیرو د ټینګولو امر صادر کړ.
قاسم جومارت توکایف په مسکو کې له خونړي برید وروسته په خپل هېواد کې د امنیتي تدابیرو پر ټینګولو سربېره له ترهګرۍ سره د مبارزې لپاره له نورو هېوادونو سره د همکارۍ د زیاتولو امر وکړ.
