د طالبانو د کانونو او پټرولیم وزارت خبر ورکړی، چې په ننګرهار کې یې د نیمه ګران بیه ډبرو د پلورلو لپاره بازار پرانیست. دغه وزارت ویلي، چې دغه د کرومایت، نفرایټ او سرپنیت د نیمه ګران بیو ډبرو بازار د دغه وزارت د پلان او پالیسۍ معین ضیا الرحمن اریوبي لهخوا پرانیستل شوی دی.
دغه وزارت زیاته کړې، دغه بازار چې د نیمه ګران بیه ډبرو د پلورلو په موخه پرانیستل شوی تمه کېږي، چې په راتلونکې کې به په نورو ولایتونو کې هم جوړ شي؛ تر څو د کورنيو او بهرنیو مینهوالو لهخوا د کانیزو سرچینو پېر او پلور زیات شي او د قاچاقو مخه یې ونیوله شي.
خو له بل پلوه څو ورځې وړاندې فارن پالیسۍ د یوه راپور په خپرولو سره لیکلي و، چې القاعده شبکه د دویم ځل لپاره افغانستان ته په ستنېدو او د طالبانو په ملاتړ د تخار او بدخشان ولایتونو پر کانونو ولکه لري.
په دغه راپور کې چې د جمعې په ورځ د (وري په ۳مه) خپور شوی راغلي، القاعده شبکې د طالبانو تر څارنې د بدخشان او تخار د کانونو د سپړلو لپاره لسګونه زره کارګران ګومارلي او له دغه کانونو څخه هره اونۍ لسګونه مېلیونه ډالر تر لاسه کوي.
د دغه راپور د موندنو له مخې، د ۲۰۲۲ کال له پيل راهیسې تر اوسه القاعده شبکې د دغو کانونو څخه ۱۹۴.۴ مېلیونه ډالر تر لاسه کړي دي.
طالبان د دوه نیم کلنې واکمنۍ پر مهال په خلاص مټ د کانونو په سپړنه او خرڅلاو بوخت دي او د دغو کانونو د عوایدو څخه خلکو ته راپور نه ورکول کېږي او نه هم بله داسې اداره شته، چې پر دغو کړنو څار او نظارت ولري.
