د طالبانو عامې روغتیا وزارت وايي، چې په ټول افغانستان کې د نري رنځ (تبرکلوز) ناروغۍ کچه د تېر پرتله پنځه سلنه کمه شوې ده. د دغه وزارت د معلوماتو له مخې، دا مهال په ټول هیواد کې د زونونو او ولایتونو په کچه د نري رنځ د تشخیص ۹۰ مرکزونه فعال دي.
د طالبانو تر واک لاندې ملي ټلویزیون نن سه شنبه د (وري اوومه) د طالبانو د عامي روغتیا وزارت د مسوولانو له قوله یو راپور خپور کړی او پکې ويلي یې دي چې د ۲۰۲۳ میلادي کال پرتله په ټول افغانستان کې د نري رنځ ناروغۍ په کچه کې پنځه سلنه کموالی راغلی.
دا هغه ادعا ده چې د روغتیا په برخه کې په سیمه ییزه او نړېواله کچه روغتیايي سازمانونو نه ده تاييد کړې.
د طالبانو عامې روغتیا وزارت ویاند ډاکتر شرافت زمان له یاد ټلویزیون سره په مرکه کې ویلي چې تېر ۲۰۲۳ کال په افغانستان کې ۴۹ زره او ۵۳۳ د نري رنځ مثبتې پیښې ثبتې شوې چې د ۲۰۲۲ کال پرتله ۵،۵ سلنه دغه پیښې کمې شوې دي.
زمان زیاتوي چې د افغانستان په ۳۴ ولایتونو کې دا مهال ۸۷۳ روغتیایي مرکزونه فعال دي چې د دوی په وینا خلکو ته خدمتونه وړاندې کوي.
روغتیاپالان وايي، نری رنځ هغه تنفسي ناروغي ده چې په اخته کېدو سره یې ناروغ مړه تبه، ځان درد، دوامدار ټوخی او وزن له لاسه ورکوي چې له یو څخه بل ته د ساه اېستلو او ګډ لوښي کارولو له لارې لیږدي.
د ۱۴۰۲ کال په سلواغې میاشت کې د طالبانو عامې روغتیا وزارت ویلي و چې په افغانستان کې د ملګرو ملتونو پراختیایي پروګرام چارواکو ژمنه ورسره کړې چې د روغتیا په برخې کې مرسته ورسره کوي چې د ساري ناروغیو لکه تبرکلوز، ملاریا او اېچ ای وي مخنیوی وکړي.
دا په داسې حال کې چې د روغتیا نړېوال سازمان ۲۰۲۳ کال په افغانستان کې د نري رنځ ناروغۍ د خپروېدو په اړه اندېښنه ښودلې وه او خبرداری یې ورکړی و چې که مخنیوی یې ونه شي، ښايي ډېر خلک پرې اخته شي.
