د طالبانو د کانونو او پټرولیم سرپرست وزیر شهابالدین دلاور د ټاپي پروژې له مشر مراد امانوف او په کابل کې د ترکمنستان له سفیر خواجه عوضوف سره لیدلي. د دغه وزارت په وینا، په دې لېدنه کې په نږدې راتلونکې کې د ټاپي پروژې د عملي چارو پر څرنګوالي خبرې شوې دي.
دغه وزارت وایي، ښاغلي امانوف په دې لیدنه کې د ټاپي پروژې د وروستیو پرمختګونو په هکله خوښي څرګنده کړې او په نږدې راتلونکې کې یې د ټاپي پروژې د عملي چارو پر څرنګوالي خبرې کړې دي.
له بل پلوه د طالبانو د کانونو او پټرولیم وزیر شهابالدین دلاور بیا ویلي، چې د ټاپي پروژې لومړنۍ چارې په چټکۍ سره روانې دي او ژر تر ژره به یې عملي چارې هم پیل شي.
دا رنګه د ترکمنستان سفیر دغه هېواد ته د افغان پلاوي د وروستي سفر په اړه معلومات وړاندې کړي او ویلي یې دي، چې په نږدې راتلونکي کې به د دغه هېواد یو پلاوی هرات ولایت ته سفر وکړي.
د ټاپي پروژه چې د ترکمنستان، افغانستان، پاکستان او هند د نومونو د لومړنیو تورو لنډیز دی؛ د دغو هېوادونو ترمنځ د غازو نل لیکې ته وایي، چې هوکړه لیک یې په ۲۰۱۵ کال کې د دغو هېوادونو د مشرانو ترمنځ د ترکمنستان په عشق اباد کې لاسلیک شو.
که څه هم د دغې پروژې د ګټې اخېستنې وروستۍ نېټه د ۲۰۱۹ کال تر پایه اټکل شوې وه؛ خو لاهم د دغې پروژې عملي چارې نه دي پیل شوې.
تر دې وړاندې د پاکستان لوړپوړي اقتصادي فورم هم په تېر ډسمبر کې د لوړې کچې مشورتي غونډې وروسته ویلي و، چې د ترکمنستان، افغانستان، پاکستان او هند د غازو نل لیکه یوه "ډېره اړینه" پروژه ده چې باید پرته له ځنډه پیل شي.
