د روسيې دولتي خبري اژانس د خپلو سرچينو په حواله ليکلي، چې په مسکو کې د کروکس کنسرت پر تالار بريد کوونکي د «خراسان غږ» ټېلېګرام چېنل له لارې چې له داعش خراسان سره تړاو لري، ګومارل شوي وو. دغه چېنل د تاجک لیدونکو د راجلبولو لپاره کار کاوه.
د چهارشنبې په ورځ، ریانووستي اژانس په یوه راپور کې لیکلي: «زموږ د همکارانو لخوا د یو کس په اړه څیړنو ښودلې چې د دې چینل لیدونکي د ترهګریزو بریدونو لپاره ګومارل کېدل. په همدې ډول، موږ وموندله، هغه کسان چې د کروکس تالار په برید کې ښکېل وو د خراسان غږ ټلیګرام چینل له لارې ګومارل شوي وو.»
دغه خبري اژانس لیکلي چې اوس د خراسان غږ چینل له روسیې او تاجکستان څخه د لاسرسي وړ نه دی او داسې ښکاري چې له منځه وړل شوی دی.
ټېلېګرام په منځنۍ اسیا کې د داعش او نورو سخت دریځو ډلو یوه د خوښې شبکه ده، چې د نورو ټولنیزو شبکو پرتله لکه میټا د اعلانونو او تبلیغ په خپرولو کې لږ بندیزونه لري.
د روسیې د فډرالي امنیتي سازمان یوه چارواکي ریانووستي ته ویلي، د دغه چېنل په جوړولو کې د امریکا او برېتانیې استخباراتي ادارې لاس لري، دا هغه تور دی چې روسي چارواکو په تېرو څو ورځو کې د داعش د برید په تړاو څو ځلې تکرار کړی دی.
امریکايي چارواکو ویلي، چې دوی د داعش خراسان فعالیتونه څاري او مخکې یې د روسیې حکومت ته په مسکو کې د کنسرت پر تالار د وري میاشتې درېیمه د برید په اړه معلومات ورکړي وو، خو د ولسمشر په ګډون روسي چارواکو دا خبره جدي نه وه نیولې.
په همدې حال کې ریانووستي په سنټ پیټرزبورګ کې د یوه قضايي چارواکي په حواله راپور ورکړی چې یو تاجک تبعه د داعش د ټېلېګرام د ډلې د غړیتوب له امله له روسیې څخه جریمه شوی او شړل شوی دی.
داعش به مسکو کې د کنسرت پر دغه تالار د برید مسوولیت پر غاړه اخیستې و، چې په پایله کې یې لږ تر لږه ۱۴۳ کسان ووژل شول.
د روسیې بهرنیو چارو وزارت د چهارشنبې په ورځ وویل، د داعش له خوا د برید پلان او عملي کول د منلو وړ نه دي، اوکراین او لوېدیځ هېوادونه یې په دې برید کې په لاس لرلو تورن کړي دي.
