د بریتانیا د کورنیو چارو وزارت لومړنۍ شمېرې ښيي، چې په تېرو درېیو میاشتو کې ۴ زره او ۶۰۰ تنه کډوال په کوچنیو بېړیو کې د مانش کانال له لارې بریتانیا ته رسېدلي دي. دغو شمېرو نوی ریکارډ جوړ کړی، چې کېدای شي د بریتانیا د لومړي وزیر لپاره په نوي سرخوږي بدل شي.
دغه شمېرې د ۲۰۲۳ کال په لومړیو درېیو میاشتو کې درې زره ۷۷۰ او په ۲۰۲۲ کال کې څلور زره او ۱۶۲ وې.
بریتانیا ته د دغو کډوالو ورتګ د سختو ګامونو د اخیستو سره، سره یو ځلې بیا د بریتانیا لومړی وزیر تر سخت سیاسي فشار لاندې راولي.
د کابینې او محافظه کار ګوند غړو ژمنه کړې وه، چې د مانش له کاناله به د کډوالو د ورتګ مخه نیسي.
سونک هیلهمن دی، چې د هغه اصلي تګلاره روندا ته د ناقانونه کډوالو ورستنول به د زیاتو کډوالو د ورتګ مخه ډب کړي؛ خو دغه تګلاره د بریتانیا د سترې محکمې د مخالفت له امله ځنډول شوې ده.
د بریتانیا د کورنیو چارو وزارت ویاند وویل:« هغه کسان چې د کانال له لارې په ناقانونه توګه بریتانیا ته ورځي دا ښيي، چې ولې موږ رونډا ته ډېرې ژر الوتنې پیلوو.»
په ۲۰۲۳ کال کې د سونک تګلاره د بېړیو د درولو په برخه کې څه نا څه بریالۍ وه او په ۲۰۲۲ کال کې دغه هېواد ته د کډوالو په ورتګ کې ۳۶ سلنه کموالی راغی.
د کارګر ګوند ویاند سټیفان کېناک وویل:« د ټولو شواهدو په خلاف ریشي سونک بریتانویانو ته وايي، چې د کوچنیو بېړیو ورتګ د کمېدو په حال کې دی او هغه اوس هم په خپله خبره ولاړ دی، چې د دغو بېړیو د ورتګ مخه به ونیسي.»
نظر پوښتنې ښيي، چې د کډوالو د ورتګ له امله د رای ورکوونکو د اندېښنو سره، سره د ریشي سونک محافظه کار ګوند تر خپل سیال کارګر ګوند شا ته پاتې دی.
