په تاجکستان کې ۹ کسان د مسکو د تیرې اونۍ د برید په تړاو نیول شوي دي
د تاجکستان یوې امنیتي سرچینې رویټرز خبري اژانس ته ویلي، چې د دغه هېواد د ملي امنیت کمېټې په مسکو کې د کروکوس کنسرت پر تالار د برید په تړاو نهه کسان نیولي دي.
د تاجکستان یوې امنیتي سرچینې رویټرز خبري اژانس ته ویلي، چې د دغه هېواد د ملي امنیت کمېټې په مسکو کې د کروکوس کنسرت پر تالار د برید په تړاو نهه کسان نیولي دي.
د دغې سرچينې په وينا، دغه نیول شوي کسان له هغو بریدګرو سره اړیکه لرلې، چې د مسکو د کنسرت پر تالار يې برید کړي وو او ویل کیږي چې د داعش - خراسان سره یې هم اړیکي نیولي دي.
سرچينې زياته کړې، چې ټول نهه کسان د دوشنبې په ورځ په وخدات ښار کې نيول شوي او د تاجکستان پلازمېنې دوشنبې ښار ته لېږدول شوي دي.
د وروستیو شمېرو له مخې، د جمعې په ورځ د مارچ په ۲۲مه د مسکو په څنډه کې د کروکوس کنسرت په تالار کې په برید کې لږ تر لږه ۱۴۰ کسان وژل شوي او ۱۸۲ نور ټپیان شوي وو.
روسیې اعلان کړی، چې هغه څلور کسان یې نیولي چې په دغه تالار کې یې په خلکو ډزې کړې وې.
۳۲کلن دلرجان میرزایف، ۲۶ کلن فریدون شمس الدین، د تاجکستان تبعه، ۱۹ کلن محمد صابر فیضاف او ۳۰ کلن مراد علي رجب علیزاده په دې قضیه کې تورن بلل شوي دي.
روسي رسنیو د دغه برید ټول شکمن کسان د تاجکستان اتباع بللي دي. د دې برید په غبرګون کې د تاجکستان ولسمشر امام علي رحمان ویلي، چې "ترهګر" په هېڅ قوم پورې اړه نه لري.
