د دغه قومندان ورور تېر نومبر د لبنان په سویل کې د اسراییل په یو بل برید کې وژل شوی و.
د سوریې د دفاع وزارت ویلي، چې اسراییلي الوتکو پرون سهار مهال د حلب ولایت په سویل ختیځه برخه کې پر څو سیمو بریدونه کړي، چې له امله یې ګڼ شمېر ملکي وګړي او پوځيان وژل شوي دي.
د دغه وزارت په خبرپاڼه کې ویل شوي، چې دغه هوايي بریدونه له ادلب او د حلب پر لویدیځو کلیوالي سیمو باندې د بې پیلوټه الوتکو له بریدونو سره هممهاله شوي.
دې وزارت دغه بریدونه په حلب او شاوخوا سیمو کې د ملکي وګړو پر ضد د «ترهګرو سازمانونو» کړنه بللې ده.
د اسراییل پوځ په دې اړه له څه ویلو ډډه وکړه.
د ایران د بهرنیو چارو وزارت ویاند ناصر کنعاني په اېکس پیغام کې ویلي، چې په سوریه کې د اسراییل بریدونه د جګړې د پراخولو لپاره یوه "ناوړه او ناهیلې هڅه" ده.
خو نوموړي دا نه دي ویلي چې دغه برید ایراني تلفات لري که نه.
دغه برید، د اکټوبر له اوومې نیټې راهیسې پر سوریې د اسراییلو په بریدونو کې تر ټولو لوړه مرګژوبه لري.
اسراییل د جمعې په سهار د سوریې په شمالي حلب ولایت کې په تیرو میاشتو کې خپل تر ټولو مرګوني بریدونه ترسره کړي او په همدې حال کې وايي، چې په لبنان کې یې د حزب الله یو جګپوړی قوماندان هم وژلی.
اسراییل په غزه کې د جګړې سره هممهاله د ایران د نیابتي ډلو پر ضد خپل عملیات ګړندي کړي دي.
د حماس له خوا پر اسراییل د اکټوبر د اوومې نیټې له برید وروسته، اسراییل په سوریه کې د حزب الله د وسلوالو او د ایران د انقلابي ګارد سپاه پاسداران د بهرنیو ځواکونو په وړاندې خپلو هوايي بریدونو ته زور ورکړی دی.
په دې وروستیو کې اسراییلي پیلوټانو، د لبنان خاورې کې دننه هم خپل بریدونه دوامداره کړي دي.
تهران او پلويانو یې د حلب او پلازمېنې دمشق په ګډون په ټوله سوريه کې ځانونه ځای پر ځای کړي دي.
د اسرایلو پوځ د جمعې په ورځ وویل، چې د لبنان د بازوریې په سیمه کې یې په یوه هوایي برید کې د حزب الله د راکټونو او توغندیو د څانګې مرستیال علي عابد احسن نعیم وژلی دی.
ویل شوي چې هغه درنو وسلو او راکټونو په برخه کې د ایران د ملاتړو ملېشو له مشرانو څخه و چې د اسراییلي ملکي وګړو په وړاندې د بریدونو د ترسره کولو او پلان کولو مسوولیت یې درلود.
اسراییل او حزب الله د لبنان په سویلي پولو کې پر یو بل د سپکو او درنو وسلو ډزې کوي.
دغو دواړو هیوادونو په ۲۰۰۶ کال د یوې میاشتې لپاره په جګړه کې ښکیل و. حزب الله هڅه کوي د حماس لپاره خپل ملاتړ په اسراییل د راکټونو په ویشتلو سره وښيي.
په دغو نښتو کې د اسراییل په شمال کې شاوخوا لس اسراییلي سرتیري وژل او پنځه ملکیان وژل شوي. دا په داسې حال کې ده چې د لبنان په سویل کې د اسراییلو په بریدونو کې نږدې ۲۷۰ د حزب الله جنګیالي او د ډاکټرانو، ملکي وګړو او خبریالانو په ګډون ۵۰ ملکي وګړي وژل شوي دي.
اسراییلو په تیرو کلونو کې په سیمه کې د ایران متحدینو ته د وسلو د لیږد د مخنیوي لپاره په دمشق او حلب دواړو کې څو ځلې نړیوال هوايي ډګرونه په نښه کړي، خو پر اسراییل د اکټوبر له ۷ نیټې د برید راهیسې د اسراییل په دغو بریدونو کې مرګژوبله درنه شوې او په همدې حاطر یې ایران دې ته اړ کړی چې خپل ځینې لوړپوړي افسران له سوریې وباسي.
