د سوریې په اعزاز ښار کې د یوې چاودنې له امله ۷ کسان وژل شوي او ۳۰ نور ټپيان دي. د سیمې اوسیدونکو او ژغورونکو رویټرز خبري اژانس ته ویلي، چې پېښه د ترکیې پولې ته نږدې د شپې هغه مهال وشوه چې په سیمه کې د خلکو ګڼه ګوڼه زیاته وه.
د دوی په خبره، چاودنه د یوه موټر بم له امله رامنځته شوې ده.
د راپورونو له مخې، تر اوسه پورې هیڅ یوې ډلې د پیښې مسوولیت پر غاړه نه دی اخیستی.
دغه سیمه د سوریې د هغو یاغیانو تر واک لاندې ده، چې ترکیه یې ملاتړ کوي او د سوریې د ولسمشر بشارالاسد مخالف دي.
د ویلو ده، چې په اعزاز ښار کې له دوه کاله مخکې ورته چاودنې وروسته د دغه ښار حالت نسبتاً ارام شوی و.
