د پولنډ لومړي وزیر ډونالډ ټوسک خبرداری ورکړی چې په نږدې راتلونکي کې د هر اړخیزې جګړې قوي امکان شته او روسیه باید اوکراین ته ماتې ورنکړي که نه نو دا به ټوله اروپا بې ثباته کړي.
د پولنډ لومړي وزیر وویل، چې جګړه "نوره په اروپا کې یوه پخوانۍ پدیده نه ده" او زیاته یې کړه "جګړه د اروپا واقعیت دی او دوه کاله وړاندې پیل شوې ده."
توسک دا څرګندونې په داسې حال کې کوي چې د پنجشنبې په ورځ روسیې د اوکراین د انرژۍ پر تاسیساتو پراخ بریدونه کړي دي.
د روسیې ولسمشر ولادیمیر پوتین تیره اونۍ وویل، چې مسکو د ناټو هیوادونو پر وړاندې "هیڅ یرغلیز نیت" نه لري. هغه زیاته کړه چې دا نظریه چې روسیه، چې د اروپا او نړۍ یو ترټولو لوی اتومي قدرت دی، به په پولنډ، بالتیک هیوادونو او چک جمهوریت - چې ټول د ناټو اتحاد غړي دي- برید وکړي، یوه بې بنسټه نظریه ده. "
کرملین، امریکا په دې تورنوي چې اوکراین ته د پیسو، وسلو او استخباراتي معلوماتو په برابرولو سره د روسیې پر ضد جګړه کوي او زیاتوي چې د امریکا سره د دوی اړیکې هېڅ کله هم دومره خرابې شوې نه وې.
کله چې هغه نه د غرب له خوا اوکراین ته د اف ۱۶ الوتکو د ورکولو په اړه پوښتنه وشوه، پوتین وویل، چې دا ډول الوتکې به په اوکراین کې وضعیت بدل نه کړي.
هغه وویل: "موږ به دغه الوتکې هم نسکورې کړو، لکه څنګه مو چې نن ورځ ټانکونه، زغره وال ګاډي او نور تجهیزات له منځه وړي دي."
پوتین وویل چې اف ۱۶ کولای شي اټومي وسلې هم انتقال کړي.
پوتین وایي؛ که دغه الوتکې د پروازونو له پاره له درېیم هېواده کار واخلي، هغه هېواد به هم د روسیې لپاره مشروع هدف وي.
