د تاجکستان د کار او کډوالو چارو وزارت ویلي، مسکو ته څېرمه د تېرې اوونۍ د کنسرت په تالار کې له ډزو وروسته له روسیې د وتونکو تاجک کارګرو شمېر مخ په زیاتیدو دی. د کروکوس کنسرت په تالار کې د خونړي برید څلور اصلي تورن د تاجکستان وګړي دي.
د تېرې جمعې په ورځ، د مارچ په ۲۲مه، وسله والو د کروکوس پر تالار برید وکړ، چې لږ تر لږه ۱۴۴ کسان یې ووژل او تر ۱۸۰ ډېر یې ټپیان کړل. دا په روسیه کې په تېرو دوو لسیزو کې تر ټولو بد برید بلل شوی.
د روسیې د مامورینو له خوا په نیول شویو لسو کسانو کې څلور د تاجکستان او شپږ نور یې د پخواني شوروي د نورو غړو هېوادونو دي.
د تاجکستان د کار او کډوالو چارو د وزیر مرستیالې شخنوزا نودیري، د روسیې دولتي خبري اژانس تاس ته وویل، «موږ ډېر تلیفونونه ترلاسه کوو. که څه هم د ځورونې شکایت پکې نشته، خو زموږ ډېری اتباع غواړي له وېرې له روسیې ووځي. تاجکستان ته د راستنیدونکو کسانو شمېر تر وتلونکو ډیر دی.»
د تاجکستان امنیتي ځواکونو د مسکو برید او داعش ډلې سره چې د دغه برید مسوولیت یې منلی دی، د تړاو په تور ۹ کسان نیولي
د روسیې د جوړونکو د ملي اتحادیې مشر انتون ګلوشکوف ویلي، چې د مهاجرو کارګرو وتل به د هېواد اقتصاد ته زیان ورسوي.
د روسیې مرکزي بانک هم ویلي، چې د کارګرو کمښت او په پایله کې د معاشونو زیاتوالی د انفلاسیون خطر پیدا کوي، چې له امله یې دغه بانک د سود کچه لوړه ساتي.
د تاجکستان د کار وزارت تمه لري چې له روسیې د کډوالو وتل به موقتي وسي.
د دغه وزارت د وېبپاڼې د معلوماتو له مخې، په ۲۰۲۳کال کې د دغه هېواد ۶۵۲زره ۱۴ کډوال کارګر له روسیې وتلي، په داسې حال کې چې دا شمېر په ۲۰۲۲کال کې ۷۷۵زره ۵۷۸تنو ته رسیده.
