ایرانۍ رسنۍ د افغانستان لپاره د ایران ځانګړي استازي حسن کاظمي قمي له قوله راپور ورکړی، چې په کندهار او مسکو کې بریدونه له یوه ځایه شوي. هغه دا نه دي ويلي چې دغه بریدونه له کوم ځایه پلان شوي خو د دواړو بریدونو تر شا یې بهرنيان تورن کړي.
ایران ټایمز تېره ورځ دوشنبه د (وري ۱۳مه) په خپله ویب پاڼه کې د حسن کاظمي قمي له قوله په خپاره شوي راپور کې ويلي، چې په کندهار او مسکو کې د داعش خراسان ډلې له لوري ترسره شوي بریدونه له یوه ځایه پلان شوي او په خبره یې بهرنیان غواړي په دې سره سیمه ناامنه کړي.
هغه په دې اړه نور جزیات نه دي ورکړي چې دغه بریدونه له کوم ځایه پلان شوي او کوم بهرني هیوادونه لاس په کې لري.
د وري میاشتې په دویمه په کندهار کې د ځانمرګي برید له امله ۴۵ تنه او د وري په درېیمه نیټه په مسکو کې د کنسرت په یوه تالار په بریدونو کې تر ۱۴۰ پورې خلک ووژل شول.
حسن کاضمي قمي له دغې رسنۍ سره په ځانګړې مرکه کې ويلي چې په افغانستان کې ثبات د سیمې له امنیت سره اړیکې لري.
قمي یو ځل بیا په افغانستان کې روان حالات، لوږه، ناکرارۍ، بېوزلي او د کډوالۍ پړه پر امریکا او ناټو ور واچوله او ویې ويل چې په تېرو شلو کالو کې یې بنسټیز کار نه دی کړی.
شنونکي وايي، تهران له طالبانو سره نږدې اړیکې لري او دغه هېواد هڅه کوي چې د سیمې په کچه د دوی اړیکې ښې کړي.
حسن کاضمي قمي له ګاونډیو هیوادونو غوښتي چې د افغانستان د اوسني حکومت پر وړاندې له پرتو ننګونو سره د مبارزې لپاره دې ګډه اجماع رامنځته کړي.
