د غزني لپاره د طالبانو امنيه قومندانۍ مطبوعاتي دفتر وايي، د دغه ولایت په ګېرو ولسوالۍ کې يوې کورنۍ یو کس د مسجد د لاسپېکر د بېټرۍ د غلا په تور وژلی. دغه اداره نن په خپله اعلامیه کې زیاتوي، چې په دې تړاو يې درې کسان هم نيولي دي.
طالبان وايي، د دې کسانو ترمنځ لومړي لفظي شخړه شوې او بيا دې دريو کسانو دغه کس وژلی دی.
د طالبانو د ځمکو د غصب د مخنیوي کمیسیون وايي، د کابل ښار د شپږمې ناحیې اړوند د امید سبز ښارګوټي د ځمکې یوه برخه «دولتي» ده. د طالبانو د عدلیې وزارت ویلي، چې د دې موضوع قانوني او شرعي څېړنه یې یوې ځانګړې محکمې ته سپارلې ده.
دغه وزارت نن په یوه خبرپاڼه کې لیکلي، چې دا پرېکړه د ځمکو د غصب د مخنیوي د کمېسیون په غونډه کې شوې ده.
د خبرپاڼې له مخې، په دې غونډه کې د عدلیې، ښار جوړونې، د کرنې او اوبو لګولو وزارتونو او یو شمېر نورو ادارو مسوولانو هم حضور درلود.
طالبانو ویلي، په دې ناسته کې د کابل ښار په امید سبز ښارګوټي کې د یو زرو ۵۹۵ جریبه ځمکې پر مسلې خبرې وشوې.
په دې غونډه کې د امید سبز ښارګوټي د ځمکو یوه برخه د «امارتي ځمکه» بلل شوې او د څېړلو موضوع یې دې غصب شویو ځمکو ته د رسیدګۍ ځانګړې محکمې ته سپارل شوې ده.
طالبان اعا کوي، چې لازمو اسنادو ته په کتو سره دغه ځمکې د «امارتي» ځمکو په توګه پېژندل شوې دي.
امید سبز ښارګوټی په کابل کې یوه هزاره مېشته سیمه ده.
طالبانو واکلچر په ته له رسېدو وروسته د ځمکو د غصب د مخنیوي او د غصب شویو ځمکو د بېرته راګرځولو په نوم یو کمېسیون جوړ کړ، خو ویل کېږي چې دغې ډلې په بېلابېلو سیمو کې د خلکو زرګونه جریبه ځمکې د دولتي ځمکو په نوم ثبت کړې دي.
د طالبانو د عدلیې وزارت همداراز زیاته کړې ده، چې په دې غونډه کې په شمالي ولایتونو کې د عامه څړځایونو او په نورو ولایتونو کې هم د ځمکو د غصب موضوع وڅېړل شوه.
په افغانستان کې د څړځایونو مسله هم له جنجالي مسایلو څخه ده.
تېر حکومت ډیری غرونه او ځمکې د دودیز اوبو لګولو شبکې څخه بهر ځمکه "دولتي" او د عامه څړځایونو په توګه اعلان کړې ده.
دا کار د دې لامل شو چې کوچیان د عامه څړځایونو په نوم غرونه وکاروي، خو دا مسله د افغانستان په ډیریو مرکزي او شمالي سیمو کې د دې قومونو او کلیوالو ترمنځ د جګړو اساس ګرځیدلې ده.
سرچنې وايي، تېره یکشنبه د غزني ګېرو کې د ناچاودې مرمۍ له امله نه، بلکې په ډرون برید کې د طالبانو په ګډون ۱۲ کسان وژل شوي. له افغانستان انټرنشنل سره داسې مکتوب هم شریک شوی چې پکې د طالبانو مشر په ګیرو کې د ډرون برید او د بې پیلوټه الوتکو د څار په هکله د بېړنۍ غونډې غوښتنه شوې.
د غزني لپاره د طالبانو د والي دفتر تېره یکشنبه وویل، چې د ګیرو ولسوالۍ په ځدراڼو کلي کې د روسیې د خت پاتې مرمۍ چاودلې او له امله یې پنځه ښځې او څلور ماشومان وژل شوي دي.
خو له افغانستان انټرنشنل پښتو سره خبرو کې سرچینې د ځايي چارواکو دا خبرې ردوي او وايي، دا ډرون برید و چې د کانونو او پټرولیم وزارت درې کسان، دوه طالب سرتېري، څلور د کور مېرمنې او درې ماشومان پکې ووژل شول
د سرچینو په خبره، په دغه برید کې د کانونو او پټرولیم وزارت د ارزونې غړی مولوي مطیع الله د بخت میر زوی هم دی او د پاتې دوو کسانو هوویت مالوم نه دی.
دا سرچینې وايي، دغو کسانو غوښتل چې په سیمه کې د لیتیمو کان په هکله پلټنې وکړي او که باوري شي چې دلته کان شته، نو د نورو څېړنو لپاره چینايي کانپوهان سیمې ته ور وبولي.
افغانستان انټرنشنل پښتو ته داسې مکتوب هم رسېدلی چې ښيي، تر دې پېښې یوه ورځ وروسته د طالبانو د مشر ملا هبت الله اخوندزاده په سپارښتنه د کندهار د والي ملا شیرین اخوند په مشرۍ بېړنۍ پوځي غونډه جوړه شوې، چې پر دغه موضوع سربېره د ډرون الوتکو پر ګرځېدو هم سره وغږېږي.
په دې غونډه کې د طالبانو د استخباراتو مرستیال تاجمیر جواد، د دفاع وزارت د استخباراتو مرستیال ملا حیات الله اخوند، د کندهار مرستیال والي حیات الله مبارک د ملا هبت الله د ځانګړي ځواک مشر عبدالاحد طالب او نورو مشرانو هم ګډون درلود.
په غونډه کې د دې پېښې د څېړلو لپاره د تاجمیر جواد په مشرۍ پلاوی ټاکل شوی دی.
د ترکیې پولیسو په شمال لویدیځ ښار بالیکسیر کې د ۵۶ افغان کډوالو او د شپږو انساني قاچاقبرو د نیولو خبر ورکړ. د راپورونو له مخې، دغه افغانان په جلا جلا عملیاتو کې په داسې حال کې تر پیژندو وروسته نیول شوي، چې غوښتل یې له ترکیې په غیر قانوني توګه ووځي.
د ترکیې (ټي ار ټي) دولتي رسنۍ نن د بالیکسیر د پولیسو په حواله راپور ورکړی، چې په مرمره، اوریندي، ادرمیت، سوسورلوک او ایوالیک کلیو کې په جلا عملیاتو کې شپږ نور کسان بیا د انساني قاچاق په تور نیول شوي دي.
راپور دغه راز زیاته کړې ده، چې د دغه هېواد د پوليسو په عملياتو کې درې موټر، دوه لارۍ، دوه کښتنۍ او د دوو بیړیو انجنونه او نږدې ١٣٥ لېټره تېل نيول شوي دي.
د ترکیې پولیسو ویلي دي، چې دغه پناه غوښتونکي د مارچ له ۲۵ تر ۳۱ مې پورې د دغه هېواد د امنیتي ځواکونو په ګډو عملیاتو کې نیول شوي دي.
اروپا ته د رسېدو لپاره ترکیه د ډېرو کډوالو په تېره بیا د افغان کډوالو موقت ځای دی.
ډیری پناه غوښتونکي اروپا ته د رسېدو لپاره له قانوني او بې قانونه لارو دغه هېواد ته ننوځي.
د ترکیې پولیسو په دې وروستیو کې د پناه غوښتونکو د پېژندنې، نیولو او شړلو لړۍ چټکه کړې ده او په سلګونه افغان کډوال هم د نیول شويو او اېستل شویو کسانو په ډله کې دي.
د قراقستان ولسمشر وایي، د افغانستان له خاورې د نړیوالو ترهګرو ډلو د ناوړه استفادې د مخنیوي لپاره باید د دې هېواد پرمختګ ته پاملرنه وشي. قاسم جورمات توکایف په افغانستان کې د انساني ناورین د مخنیوي لپاره د بشردوستانه مرستو پر دوام هم ټينګار وکړ.
نوموړي دغه څرګندونې نن د شانګهای سازمان د غړو هېوادونو د ملي امنیت سلاکارانو په ۱۹مه غونډه کې وکړې.
دغه دوه ورځنۍ غونډه د سې شنبې په ورځ د قزاقستان په پلازمېنه استانه کې پیل شوه.
د قزاقستان د بهرنیو چارو وزارت ویلي، چې په دې غونډه کې د شانګهای د همکاریو سازمان د مسوولیتونو په ساحه کې د ترهګرۍ، بېلتونپالنې، افراطیت او د نشه یي توکو د غیر قانوني قاچاق پر وړاندې د ګډې مبارزې په ګډون پر مهمو نړیوالو مسایلو خبرې کیږي.
د قزاقستان د بهرنيو چارو وزارت وياند ویلي و، چې د نړیوالو پلاني جرمونو پر وړاندې مبارزه او د نړیوالو اطلاعاتو د امنيت په برخه کې همکاري د دغې غونډې له مهمو موضوعاتو څخه دي.
پاکستان له منځنۍ اسیا سره د خپلې سوداګرۍ د پیاوړتیا لپاره په لومړي ځل په خپلو لاریو کې د افغانستان له لارې د تاجکستان تر پلازمېنې دوشنبې خپل کچالو ورسول. د پاکستان رسنۍ د ځمکې له لارې په اوو ورځو کې تر ۱۴ سوه کیلومتره واټن پورې د دغه هېواد د الوګانو رسول یو مهم پرمختګ بولي.
د پاکستان رادیو نن د یوې ویډیو او دې خبر خپرولو سره وايي، چې د تاجکستان پلازمېنه دوشنبه کې د دې کاروان د رسېدو لپاره ځانګړي مراسم جوړ شوي وو.
د تاجکستان د ټرانسپورټ وزیر عظیم ابراهیم له پاکستان سره د ځمکنۍ سوداګرۍ پیلېدل د دواړو لپاره مهم بللي دي.
له تاجکستان سره د افغانستان له لارې د پاکستان سوداګري په داسې وخت پیلېږي چې لا هم اسلام اباد له هند سره د افغانستان د سوداګرۍ ته خنډونه جوړوي.
پاکستان د کراچۍ له لارې افغانستان ته د ټرانزېټ توکو په لېږدو کې هم جنجال جوړوي او له امله یې اوس سمندري سودګري نږدې ۷۰ سلنه د ایران له لارې کېږي.