د هرات حوزوي روغتون ډاکتران وايي، د روغتیا نړېوال سازمان ورسره د درملو او طبي توکو مرسته کړې چې په دې سره به د یاد ولایت د خلکو روغتیایي ستونزې راکمې شي. دغه ډاکتران وايي، یادې مرستې به د ښځو او ماشومانو روغتیايي ستونزې کمې او د مړېنې کچه راټيټه کړي.
د روغتیا نړیوال سازمان ویلي، چې له تېر سپټمبر راهیسې یې د افغانستان په ۱۵ ولایتونو کې له ۲۵ روغتونونو سره د څه باندې ۴،۴ میلیون ډالرو په ارزښت د طبي توکو او درملو مرسته کړې ده.
دغه سازمان وايي، چې د دوی مرستې به په روغتونونو کې ۳،۵ میلیون خلکو ته د خدمت جوګه شي.
بلې خوا تېره ورځ د پکتیا حوزوي روغتون ډاکترانو له دې امله کاربندیز کړی وو چې د پکتیا لپاره د طالبانو د عامې روغتیا رییس یې په میاشتو میاشتو معاشونه ځنډوي او پر وخت اړوند مرستندویه روغتیايي موسسو ته د معاشونو د لېږد مرحله سرته نه رسوي.
د روغتیا نړېوال سازمان د افغانستان څانګې تېره ورځ سه شنبه د (وري ۱۵مه) په خپله ایکس پاڼه لیکلي چې د افغانستان له روغتیايي برخې سره د مرستو په لړ کې یې دا ځل د دغه هيواد په ۱۵ ولایتونو کې له ۲۵ روغتونونو سره د څه باندې ۴،۴ میلیون ډالرو په ارزښت د طبي توکو او درملو مرسته کړې ده.
د روغتیا نړیوال سازمان ټینګار کړی چې د دوی مرستو په افغانستان کې د ناروغیو او مړینې په کمولو کې مهم رول لوبولی دی.
دغه سازمان په ایکس پاڼه د هرات حوزوي روغتون د طبي برخې مدیر فرهاد افضلي له قوله لیکلي: «زموږ روغتون د (ډبلیو ایچ او) درمل او طبي توکي ترلاسه کړل. دا مرسته به باکیفیته روغتیایي خدمتونو ته لاسرسی ښه کړي، په ځانګړې توګه د ښځو او ماشومانو لپاره. موږ د دغه سازمان څخه د دوی دوامداره ملاتړ لپاره د زړه له کومې مننه کوو.»
د پکتیا حوزوي روغتون ډاکترانو له دې امله کاربندیز کړی وو چې د پکتیا لپاره د طالبانو د عامې روغتیا رییس یې په میاشتو میاشتو معاشونه ځنډوي او پر وخت اړوند مرستندویه روغتیايي موسسو ته د معاشونو د لېږد مرحله سرته نه رسوي.
