په کابل کې د مکروریانو یوشمېر اوسېدونکو افغانستان انټرنشل پښتو ته ویلي، چې د طالبانو لهخوا پر دوی په زور د اخیستل شويو اوبو میټرونو د لګولو لړۍ ځنډول شوې ده. طالبانو په سلواغې میاشت کې د کابل په ځینو برخو کې خلکو ته ویلي وو، چې په خپلو کورونو کې دې د اوبو میټرونه ولګوي.
هغه مهال د کابل ښار دغو اوسېدونکو شکایت کړی و، چې طالبانو خلک اړ کړي چې په کورونو کې د اوبو میټرونه ولګوي.
افغانستان انټرنشنل ته د کابل د یوشمېر اوسېدونکو لهخوا په رسېدلیو راپورونو کې ویل شوي وو، چې د میټرونو د لګولو چاره د کابل په بېلابېلو سیمو کې پیل شوې ده.
که څه هم د کابل ښاریان د خپل بد اقتصادي وضعیت سره د اوبو د بېل پر اضافه کېدو اندېښمن وو؛ خو د طالبانو تر کنټرول لاندې د حفظ او مراقبت ریاست لهخوا د فشارونو له امله یې دغه میټرونه پېرلي وو؛ خو د میټرونو دغه بهیر له پیلېدو وړاندې بېرته ځنډول شوی دی.
د کابل یو اوسېدونکی صبور وایي:« په څه کم ۳۰۰۰ افغانۍ یې د اوبو میټر پېرلی او په لګولو یې لا نورې پیسې هم ورکړې وې؛ خو اوس یې لرې کول بله لانجه ده، د لرې کولو لپاره یې باید ټول دیوال وسپړو او دغه کار لا نور هم تاواني کړم. هغه وایي، ډېریو دغه میټرونه پېرلي او اوس ورسره په کور کې پراته دي؛ خو د حکومت لهخوا یې د لګولو څرک هم نه لیدل کېږي.»
د هغه په وینا، د ګوتو په شمېر یوازې د یو څو کورونو میټرونه لګول شوي؛ نور ټول همداسې پراته دي.
یو شمېر کابل ښاریانو افغانستان انټرنشنل ته دا هم ویلي، چې طالبانو د میټرونو د یوې کمپنۍ سره تړون لاسلیک کړی و چې پر خلکو میټرونه وپلوري او په ګټه کې یې دوی هم شریک دي.
ګڼ کابل ښاریان وايي، طالبانو په دې وروستیو کې د بېلابېلو مالیو په لګولو او له خلکو څخه د پېسو په اخیستلو پیل کړی او په دې توګه هڅه کوي، چې د خپلې ډلې د غړو او خپلو ځواکونو لګښتونه له دغو لارو پوره کړي.
