د ترکیې امنیتي ځواکونو د شنبې په ورځ لږ تر لږه ۴۸ کسان له داعش سره د اړېکو او د استانبول په یوه کلیسا کې د ډزو په تور ونیول. د تېر کال سلواغې په میاشت کې مخ پټو کسانو د استانبول په ساریار بویوکدره سیمه کې پر یوې کلیسا برید وکړ چې په پایله کې یې یو کس ووژل شو.
په سیمه کې د داعش د ګواښونو له زیاتیدو وروسته ترکیې د داعش د شکمنو کسانو د پېژندلو او نیولو عملیات پیل کړي او په دې وروستیو کې یې په سلګونو کسان د داعش ډلې د غړیتوب او یا له دغې ډلې سره د همکارۍ په شک نیولي دي.
د روانې میاشتې په پیل کې د ترکیې د کورنیو چارو وزیر اعلان وکړ چې هېواد یې د داعش پر ضد پراخ عملیات پیل کړي دي. د هغه په وينا، له جنورۍ څخه تر مارچ مياشتې پورې یې له ١٣٠٠ څخه زيات عمليات کړي چې په لړ کې یې د داعش دوه زره او ٧٣٠ غړي نيول شوي دي.
تېره اوونۍ د ترکیې د کورنیو چارو وزارت ۵۱ کسان له داعش ډلې سره د همکارۍ په تور ونیول. پر دې سربیره د ترکیې د کورنیو چارو وزارت د وري میاشتې په اوومه نیټه په ساکریا ښار کې د داعش ډلې پر وړاندې په ۱۷ عملیاتو کې د دغې ډلې ۱۴۷ غړي ونیول.
د ترکیې امنیتي چارواکو ویلي دي چې امنیتي ځواکونه به یې د ملي استخباراتو ریاست په همکارۍ د هیواد په بېلا بېلو ښارونو کې یو لړ عملیات ترسره او دوام ورکړي.
