د پاکستان د دفاع وزیر: د هند د هر ډول احتمالي ګواښ پر وړاندې ځواب ورکولو ته اماده يو
د پاکستان د دفاع وزیر خواجه محمد اصف ویلي، چې د دوی پوځ او امنیتي ادارې پر پاکستان د هند د احتمالي ګواښونو پر وړاندې ځواب ورکولو ته اماده دي.
د پاکستان د دفاع وزیر خواجه محمد اصف ویلي، چې د دوی پوځ او امنیتي ادارې پر پاکستان د هند د احتمالي ګواښونو پر وړاندې ځواب ورکولو ته اماده دي.
نوموړي تېره ورځ په اسلام اباد کې له یوې خصوصي رسنۍ په خبرو کې ویلي، چې پاکستان تل د هند د پوځي برتري دعوې په ډاگه کړې دي.
د پاکستان د دفاع وزیر زیاته کړې ده، چې د ترهګرۍ ټولې ځالې په هند پورې تړاو لري او د هند وزیران او چارواکي سیاسي ویناوې د خپلو سیاسي موخو لپاره کوي.
تېره اونۍ د هند د لومړي وزیر نرېندرا مودي په ګډون یو شمېر چارواکو د پاکستان په تړاو د ترهګرۍ د ملاتړ بیانیې کړې وې.
دغې چارې نه یوازې دا چې د پاکستان د یو شمېر چارواکو غوسه راپارولې؛ بلکې په ټولنیزو رسنیو کې یې هم د یو شمېر کاروونکو تر منځ ناندرۍ پیل کړي دي.
هند تل پر پاکستان تور لګوي، چې په سیمه کې د ترهګرو ملاتړ کوي؛ خو پاکستان بیا دغه ادعا ردوي.
د پاکستان پوځ اعلان وکړ، په تېرو څلریشت ساعتونو کې په خیبر پښتونخوا او بلوچستان کې یو لړ عملیاتو کې شپږ پاکستاني امنیتي ځواکونه وژل شوي دي. د پاکستان پوځ د خبرپانې له مخې؛ په دغو نښتو کې لږ تر لږه ۱۲ وسله وال وژل شوي دي.
پوځ د یکشنبې په ورځ د (وري ۱۹مه) په خپله خبرپانه کې لیکلي، چې د دېره اسماعیل خان په کوټ سلطان کولاچي سیمه کې د استخباراتي عملیاتو په ترڅ کې ۸ وسله وال له امنیتي ځواکونو سره په وسله واله نښته کې وژل شوي دي.
د خبرپانې د معلوماتو له مخې؛ دغه عمليات په کوټ سلطان کې د وسله والو د شتون په اړه د کشفي راپورونو پر بنسټ ترسره کړل.
خبرپاڼه زياتوي، چې دغه وسله والو د امنيتي ځواکونو په وړاندي بریدونو او د ملکي وګړو په هدفي وژنو کې لاس درلود.
د خبرپاڼې له مخې؛ د پاکستان پوځ ویلي، چې له وژل شویو وسله والو څخه یې وسلې، مهمات او چاودېدونکي توکي نیولي دي.
د پوځ په خبرپاڼه کې ویل شوي، چې تېره ورځ او شپه وسله والو په کراچۍ کې د امنیتي پوستو بریدونه کړي او درې پولیس یې وژلي او درې نور یې ټپیان کړي دي.
په همدې حال کې د پاکستان لومړي وزیر شهباز شریف پر خپله اېکس پاڼه کې لیکلي، چې په لکي مروت کې پر پوليسو بريد غندلی.
هغه زیاته کړه: «د خیبرپښتونخوا پولیس د ترهګرۍ په وړاندې د یو ځواک په څیر عمل کوي او بزدلانه ترهګریز فعالیتونه نشي کولی د دوی هوډ ګډوډ کړي.»
دغه راز؛ د خيبر پښتونخوا ايالتي وزير علي امين خان ګنډاپور هم د وسله والو بريدونه غندلي او پوليسو ته يې امر کړى، چې د پېښې عاملين دې بې له ځنډه وپېژني او د قانون منګولو ته دې وسپاري.
پر همدې مهال کې د وړي موسم په رارسیدو وسله والو ډلو په پاکستان او په ځانګړې توګه په بلوچستان او خیبر پښتونخوا کې خپلو هدفي بریدونو ته زور ورکړی دی.
د تحریک طالبان پاکستان ډلې له لوري په خپره شوې یوه خبرپاڼه کې د دغې ډلې د مشر نور ولي محسود په اختریز پیغام کې د پاکستان پوځ عسکرو ته ويل شوي چې خپلې وسلې دې پر ځمکه کېږدي او له دوی سره دې یو ځای شي. د ټي ټي پي وسله واله ډله دا مهال د پاکستان پوځ او حکومت په وړاندې جنګیږي.
تحریک طالبان پاکستان تېره ورځ شنبه ناوخته د (وري ۱۸مه) په یوه خپره کړې خبرپاڼه کې د پاکستان پوځ عسکرو ته سپارښتنه کړې چې د دوی په وړاندې له جګړې لاس واخلي او وسلې په ځمکه کیږدي.
په خبرپاڼه کې وړاندې ویل شوي چې «د څو فاسدو جنرالانو په مخکې د څو زرو روپیو لپاره مه جنګیږئ، هغوی به ټولې شوې پیسې له ځان سره بهر ته یوسي او تاسو به په میدان پریږدي.»
د ټي ټي پي په دغې اعلامیه کې د پاکستان پوځ د کرایې پوځ بلل شوی او لیکلي یې دي چې په پښتنو سیمو کې وژنې کوي او په کلیو کې ناکرارۍ جوړوي.
تر دې وړاندې هم تحریک طالبان پاکستان په ورته خبرپانو کې د پاکستان پوځ او نورو حکومتي ادارو کارکونکو ته ګواښونه کړي چې د پوځ له لیکو او حکومتي ادارو څخه ووځي کنه دوی به یې ووژني.
تېر دوه کلونه په پاکستان کې امنیتي حالت تر بل وخت ترینګلی شوی او د دغه هیواد پر پوځ، پولیسو، پوله ساتو ځواکونو، حکومتي کارکونکو، قومي مشرانو او فعالانو باندې د وسله والو ډلو له لوري ځانمرګي او وسله وال بریدونه، سړک غاړې ماین چاودنې او هدفي وژنې تر پخوا ډیرې شوې او خلک یې اندېښمن کړي.
د پاکستان لوړپوړي چارواکي په دغه هیواد کې د ناامنۍ ټولو پېښو د پړې ګوته په کابل کې د طالبانو حکومت ته نیسي او ادعا کوي چې د طالبانو حکومت د افغانستان په خاوره کې ټي ټي پي وسله والې ډلې پناه ځایونه ورکړي او دغه ډله له هغه ځايه په پاکستان کې بریدونه کوي.
طالبانو تل د پاکستاني چارواکو دغه ډول ادعاوې رد کړې دي او دا یې د پاکستان کورنۍ موضوع بللې ده.
د طالبانو کډوالو او راستنېدونکو چارو وزارت وايي، له پاکستان څخه ۲۳۱ افغان کډوال په جبري ډول راستانه کړل شوي. دغه کډوال د ډیورنډ کرښې سپین بولدک او تورخم په لارو له پاکستانه راستانه شوي دي.
د طالبانو کډوالو او راستېدونکو چارو وزارت د یکشنبې ورځ د (وري ۱۹مه) نېټه په اېکس پاڼه لیکلي چې د افغان کډوالو ۱۸ کورنۍ چې د غړو شمېر یې ۹۹ تنه کیږي د ننګرهار تورخم له لارې د وري ۱۸مه نېټه هېواد ته په زور راستنې کړل شوې دي.
دغه وزارت وايي، په همدې نېټه بیا د کندهار ولایت د سپین بولدک له پاکستان څخه ۱۶ کورنۍ چې د غړو شمېر یې ۹۹ تنه کیږي په جبري ډول هیواد ته راستانه کړل شوي دي.
همدارنګه د طالبانو کډوالو وزارت وايي چې د وري میاشتې په ۱۸مه نیټه له پاکستانه هغه ۳۳ تنه زنداني افغان کډوال چې تازه راخوشې شوي وو هیواد ته رستانه کړل شوي.
کډوالو وزارت وړاندې وايي، راستانه شوي کډوال یې تر ثبتېدو وروسته د کډوالو عالي کمیشنرۍ او د کډوالو نړېوال سازمان ته د مرستو ترلاسه کولو په موخه ور پیژندلي دي.
ويل کیږي، په دغو کډوالو کې یو شمېر چې وړ پیژندل شوي ورسره ځینې نغدي او روغتیايي مرستې هم شوې دي.
د طالبانو حکومت په سر کې ژمنې کړې وې چې له ګاونډیو هیوادونو ورتلوونکو کډوالو سره د مرستو تر څنګ به دوی ته د اوسېدو لپاره ځمکې ویشي خو اوس ډیری هغه کډوال چې افغانستان ته تللي وايي، چې لا یې برخلیک نه دی معلوم او ځمکې یې نه دي ترلاسه کړې.
د طالبانو د کډوالو او راستنېدونکو چارو وزارت وايي، په ۱۴۰۲ کال کې له ګاونډیو هیوادونو څخه افغانستان ته یونیم ميلیون کډوال راستانه شوي دي.
په دې وروستیو کې پاکستاني رسنیو راپور ورکړی، چې د ۲۰۲۴ کال د مارچ تر ۱۲مې نېټې له پاکستانه د ټولو ستنو شویو بې اسناده افغانانو شمېر تر ۵۱۳ زرو او ۵۰۶ ته لوړ شو او په وینا یې د ستنېدو دغه لړۍ لاهم روانه ده.
د پاکستان د بهرنیو چارو وزارت ننپه یوه اعلامیه کې، په پاکستان کې د هند د پټو عملیاتو د افشا کولو په اړه د ګارډین ورځپاڼې د یو راپور په غبرګون کې د هند د دفاع وزیر څرګندونې وغندلې. د هند دفاع وزیر سي اېن اېن ته ویلي، «پاکستان ته به ننوځو او هلته به ترهګر په نښه کړو.»
رجنت سینگ ټلویزیون سره په مرکه کې زیاتوي، نوی ډېلی به «په هر هغه ترهګر پسې د پاکستان خاورې ته ننوځي چې په دغه هېواد کې له ترهګریزو چارو وروسته له پولې ور واوړي.»
د رجنت سینګ له خبرو مخکې د بریتانیا ګارډین ورځپاڼې ویلي، چې هند له ۲۰۲۰ کال راهیسې په پاکستان کې شل کسان وژلي دي.
دې ورځپاڼې خپل راپور کې ویلي، چې نوي ډېلي دا کسان په بهر کې د دغه هېواد ضد ترهګرو د له منځه وړلو د پلان له مخې په نښه کړي دي.
د پاکستان بهرنیو چارو وزارت هند د دغه هېواد په خاوره کې د بې ګنا خلکو په وژلو تورنوي او په اعلامیه کې رغلي چې د ۲۰۲۴ کال د جنورۍ په ۲۵ مه، د هندوستان له خوا د پاکستان په خاوره کې د غیر قانوني او د هند له سرحدونو باندې وژنو په اړه شواهد وړاندې کړل.
د پاکستان د بهرنیو چارو وزارت په وینا، د هند له خوا په دغو بریدونو کې ملکیان وژل شوي او بیا د ترهګرو په توګه ښودل شوي، چې په دې اړه د هند اعتراف په خپله د یو جرم پر کولو اعتراف دی.
اعلامیه کاږي، چې نړیواله ټولنه باید هند د خپلو ناوړه او غیرقانوني کړنو حساب ورکولو ته مجبور کړي.
د پاکستانبهرنیو چارو وزارت وايي، دغه هیواد د خپل حاکمیت پر وړاندې د هر ډول تیري د دفاع لپاره په کلکه ولاړ دی او خپله وړتیا یې د ۲۰۱۹ کال په فبرورۍ کې د هند برید ته په قوي ځواب ویلو سره ښودلې ده.
پاکستان وايي، چې د هند د ځواکمن پوځ په اړه د هغه هیواد ادعاوې پاکستان په ۲۰۱۹ کال کې تشې ثابتې کړې.
دغه وزارت وايي، چې د هند چارواکي، د عادت له مخې د کرکې ډکې څرګندونې کوي، تر څو د خپلو خلکو احساسات وپاروي او په ټاکنو کې ترې ګټه پورته کړي.
په دغه اعلامیه کې راغلي: "دا ډول ناسم او غیر مسولانه چلند نه یوازې سیمه ییزه سوله زیانمنوي بلکې په راتلونکې کې د خبرو اترو امکانات هم له خنډ سره مخامخ کوي.”
د بهرنیو چارو وزارت وايي، چې پاکستان تل په سیمه کې سولې ته خپله ژمنتیا ښودلې ده او دا چې د سولې لپاره د دوی له ارادې باید غلط برداشت ونشي.
دغه وزارت زیاته کړې، چې تاریخ دا ثابته کړې چې پاکستان د ځان نه د دفاع لپاره قوي هوډ او وړتیا لري.
هند چې د پاکستان حکومت د دوی ضد وسلوالو ته د پټنځیو په ور کولو تورنوي، دفاع وزیر یې د ګارډین د راپور په هکله له سي اېن اېن سره په خبرو کې ویلي: «که دوی پاکستان ته وتښتي، موږ به یې د وژلو لپاره پاکستان ته ننوځو.»
رجنت سینګ زیاتوي« «هند له خپلو ګاونډیانو سره تل ښه اړیکي غواړی... خو که څوک بیا بیا هند ته په بدو سترګو ګوري، هند ته راځي او ترهګریزو چارو ملاتړ کوي، موږ یې هم نه پرېږدو.»
د هند او پاکستان اړیکي پر ۲۰۱۹ کال له هغه وروسته خراب شول چې په کشمیر کې پر هندي پوځیانو ځانمرګی برید وشو او نوي ډېلي یې په مقابل کې په پاکستان کې د وسلوالو مرکز په نښه کړ.
پاکستان د روان کال لومړیو کې وویل، چې د نوي ډېلي سره تړاو لرونکي جاسوسان په دغه هېواد کې د دوو پاکستاني وګړو په وژلو کې لاس لري، خو هند دا تور پروپاګنډ وباله.
د ګارډین راپور له هغه څو میاشتې وروسته دی چې کاناډا او امریکا په دغو هېوادونو کې هند د خپلو مخالفانو د وژلو په هڅه تورن کړ.
د پاکستان د پوځ د عامه اړیکو دفتر نن یوه خبرپاڼه کې ویلي، ځواکونو یې د پښتونخوا په ډېره اسماعیل خان کې د استخباراتي معلوماتو پر بنسټ عملیاتو کې اته وسلوال وژلي دي. د پاکستان پوځ په یو بله خبرپاڼه کې هم د شمالي وزیرستان کې د عملیاتو پرمهال د ۲ وسلوالو د وژلو ادعا کړې ده.
د جیو ځايي ټلویزیون د پاکستان د پوځ د عامه اړیکو دفتر په حواله لیکلي، چې ددغو عملیاتو پر مهال له وسلوالو وسلې او چاودیدونکي توکي هم ترلاسه کړي دي.
په دې دواړو خبرپاڼو کې د پاکستان پوځ ټینکار کړی دی، چې د وسلوالو تر ختمېدو پورې به خپلو عملیاتو ته دوام ورکوی.
په اعلامیه کې د وسلوالو د وژل کېدو شناخت نه دی په ډاکه شوی، چې وژل شوي وسلوال د کومې ډلې دي.
تر اوسه په سیمه کې وسلوالې ډلې ټي ټي پي کوم غبرګون نه دی ښودلی.
په ډېره اسماعیل کې یو شمیر ځايي اوسیدونکي بیا وايي، چې د شپې لخوا درنه جګړه وه او د چاودنو غږونه یې اوریدلي دي.
د ځايي سرچینو د معلوماتو له مخې تېره شپه د شمالي وزیرستان میرعلي سیمه کې پاکستاني طالبانو د پاکستان د پوځ اړوند پر یو مرکز راکیټي بریدونه کړي دي.
په برید کې شوي مرګ ژوبلې په اړه معلومات نشته.
میرعلي د پاکستاني طالبانو اړوند حافظ ګل بهادر ګروپ مشر پلرنی ټاټوبی ګڼل کیږي، چې وخت ناوخت په دغه سیمه کې وسلوالو بریدونو راپورونه ورکول کیږي.