په روزګان کې د سيلابونو له راوتلو وروسته درې ماشومان په اوبو کې ډوب شوي
د طالبانو تر کنټرول لاندې باختر خبري اژانس ویلي، چې روزګان ولایت کې د سیلابونو له راتلو وروسته درې ماشومان په اوبو کې ډوب شوي او تراوسه یې برخلیک معلوم نه دی.
د طالبانو تر کنټرول لاندې باختر خبري اژانس ویلي، چې روزګان ولایت کې د سیلابونو له راتلو وروسته درې ماشومان په اوبو کې ډوب شوي او تراوسه یې برخلیک معلوم نه دی.
دغې دولتي رسنۍ په خپل راپور کې لیکلي، چې په پنجشیر ولایت کې هم سېلاب «انساني او مالي زیانونه» اړولي دي.
د دغې رسنۍ راپور کې راغلي « د روزګان او پنجشېر په بېلابېلو سيمو کې د دغو سېلابونو له امله د استوګنې کورونه، کرنيزې ځمکې او سړکونه ويجاړ شوي دي.»
تر اوسه د دغو ویجاړیو په اړه معلومات نه دي خپاره شوي.
د طالبانو د ترانسپورت او هوايي چلند وزارت د هوا پېژندنې ادارې د شنبې په سهار (د وري ۲۵مه) په ټول افغانستان کې د سختو واورو او بارانونو، برېښنا او سېلابونو د احتمال خبرداری ورکړی و.
دغه وزارت په اېکس پاڼه لیکلي، چې د هېواد په بېلابېلو برخو کې د باران کچه د ۱۵ تر ۶۰ ملي مترو او د واورې کچه له ۱۵ تر ۴۰ سانتي مترو اټکل شوې ده.
همدا تېره ورځ هم په کندهار او هلمند ولایتونو کې د تندر د لوېدو له امله پنځو کسانو ته مرګ ژوبله اوښتې ده.
د هلمند د لښکرګاه ښار ته څېرمه په باباجي او ګرشک ولسوالیو کې سیمهییز خلک وایي، چې د تالندې او برېښنا له امله یو کس مړ شوی او د یوې ښځې په ګډون دوه ماشومان سوځېدلي دي.
له بل پلوه د کندهار د سپین بولدک ولسوالۍ په زاړه کلي کي هم یو ځوان د تندر د لوېدو له امله مړ شوی دی.
ورته مهال په ارزګان ولایت کې طبیعي پېښو ته د طالبانو د چمتووالي مشر سیمهییزو رسنیو ته ویلي، د تېرې ورځې راهیسې د دغه ولایت په مرکز ترینکوټ او نورو ولسوالیو کې د سختو ورښتونو او سېلابونو له امله درې کسان مړه شوي دي.
هغه ویلي، دغو سېلابونو کې شاوخوا ۳۰۰ کورونه ویجاړ شوي او همدارنګه سلګونه جریبه کرنیزې ځمکې هم له منځه تللې دي.
له بل پلوه د کندهار په معروف ولسوالۍ کې هم د شړکنده بارانونو له امله سېلابونه راوتي.
د کندهار د سپین بولدک ولسوالۍ په لوی کارېز سیمه کې هم سېلابونو یوشمېر خټین کورونه نړولي دي.
د سیمهییزو خلکو په خبره، یوازې په لنډي کلي کې یې تر ۹۰ زیات پسونه وړي دي.