ځانکړی خبر: ملا هبت الله دوحه کې له بهرنیانو سره د طالبانو «خپلسرې» لیدنې بندې کړې

په ننګرهار ولایت کې د طالبانو د اطلاعات او کلتور ریاست د اطلاعاتو امر صدیق الله قریشي وايي، د تورخم دروازه د پاکستان له لوري د هغو ناروغانو لپاره د دوشنبې په ورځ د (وري ۲۷مه) وتړل شوه چې د پاکستان ویزه نه لري.

د طالبانو تر واک لاندې باختر اژانس د خبر له مخې پاکستاني چارواکو په ننګرهار کې د طالبانو ځايي مسولینو ته خبر ورکړی چې، پر تورخم دروازه هغه ناروغانو ته اجازه نه ورکوي چې پاکستان ته د تګ لپاره قانوني اسناد نه لري.
خو په سیمه کې ځايي خبریال فرهاد شینواري افغانستان انټرنشنل پښتو ته وویل، چې لا هم د سختو ناروغانو له پاره دغه دروازه پرانیستې ده؛ خو هغه ناروغان چې روغتیايي حالت یې د اندېښنې وړ نه وي د هغو لپاره دغه دروازه له پرون راهیسې تړل شوې ده.
بل خوا په تورخم کې د ناروغانو د انتقال کمیسیون هم له ناروغانو غوښتي، چې تر راتلونکې خبرتیا دې یاد کمېسیون ته مراجعه نه کوي.

دا په داسې حال کې ده، چې تر دې وړاندې دغه لاره د څو میاشتو لپاره د هغه موټر چلوونکو پر مخ هم تړل شوې وه، چې ویزې یې نه لرلې؛ خو د پاکستان او طالبانو تر منځ د موټر چلوونکو لپاره د تګ راتګ لپاره د ځانکړو کارټونو د جوړېدو پرېکړه شوې، چې لا هم دغه کارټونه هغوی ته نه دي ورکړل شوي؛ خو تر اوسه هغوی ته د تګ راتګ په برخه کې ستونزې نه دي راولاړې شوي.

د دغې ادارې ویاند قیصر اپریدي افغانستان انټرنشنل پښتو ته وویل، چې دوی د پاکستاني چارواکو سره د هغو افغان کډوالو ستونزې شریکې کړې چې دا مهال دوی په افغانستان کې د بېرته ستنېدو پر مهال ورسره مخامخېدای شي.
له هغه مهاله چې د پاکستان حکومت هغو افغان کډوالو ته چې د کډوالۍ (اې سي سي) کارټونه لري د اپرېل تر پنځلسمې وخت ټاکلی، ورسره ګڼ افغانان اندېښمن دي او وايي چې که چېرته د مخکیني پړاو په څېر دوی اېستل کېږي؛ نو دوی به د سترو ننګونو او ستونزو سره مخامخ شي.
په اسلام اباد کې افغان کډوال محمد نعیم افغانستان انټرنشنل ته وویل، چې نوموړی د شپاړسو کالو را په دې خوا په راولپنډۍ کې اوسېږي او دلته کاروبار کوي.

هغه وايي: همدا اوس زما ټول ماشومان دلته په زده‌کړو بوخت دي، ټولې لوڼې مې ښوونځیو او پوهنځیو ته ځي که موږ ستنول کېږو؛ نو د دوی برخلیک ته حیران یم چې څه به کېږي، هلته خو د دوی لپاره د زده‌کړو اسانتیاوې هم نه شته.
عزت الله یو بل افغان دی چې وايي دلته یې په تېرو شلو کالو کې یې ځانته ژوند جوړ کړی؛ که چېرته هغه په زوره ستنول کېږي د هغه ټول ژوند ورسره زیانمنېږي.

هغه وړاندې وايي: حکومت ته په کار دا دي، چې په دې برخه کې خلکو ته کافي وخت ورکړي؛ تر څو هغوی د خپل ژوند ټولې چارې راغونډې کړي او خپل حسابونه کتابونه راټول کړي. داسې خو نه کېږي، چې په یوه ورځ یا یوه میاشت کې درته ووايي چې ته ووځه دا چې ستا دلته ټول کاروبار او ژوند خوندي دی هغه به څنګه کېږي؟
زرغونه یوه بله افغان کډواله ده، چې په اسلام اباد کې ژوند کوي هغه په دې برخه کې د پړې ګوته په افغانستان کې اوسنیو واکمنانو ته نیسي.

هغه زیاتوي: که دوی په رښتیني توګه ځانونه د افغانستان واکداران بولي؛ نو باید د ډیپلوماټیکو لارو چارو دې د پاکستاني چارواکو سره د خپلو خلکو د برخلیک په اړه خبرې اترې وکړي، واکمني خو دا نه ده چې یوازې څوکۍ ونیسه او د واک پر ګدۍ تکیه شه نور د خلکو له غمه بې‌غمه اوسه.
له تېرې ورځې را په دې خوا داسې رپوټونه خپاره شوه، چې ګواکې د پاکستان حکومت غواړي سر له ننه د (اپرېل په ۱۶مه) افغان کډوال په زوره له پاکستانه وباسي؛ خو په پېښور کې ازاد خبریال رفعت الله ورکزی وايي، چې دا مهال په خیبر پښتونخوا کې د افغان کډوالو د اېستلو په اړه کوم ځانګړی راپور نه شته او د بلوچستان په صوبه کې هم سیمه‌ییزو چارواکو ویلي، چې تر دې مهاله یې داسې کومه پرېکړه نه ده کړې.
داسې راپورونه هم شته، چې په دې وروستیو کې افغانستان ته د پاکستانی پلاوي په ورتګ کې د دواړو غاړو تر منځ داسې پرېکړه شوې چې دمګړۍ دې د افغان کډوالو په ستنولو کې پاکستانی لوری له بېړې کار نه اخلي او په دې برخه کې دې یو څه نرمښت راولي.

وروسته له هغې چې افغانستان انټرنشنل - پښتو د نوموړي د وروستۍ وینا په تړاو راپور خپور کړ، حکمتیار ته نېږدې سرچینې وايي، چې نن ماښام مهال د نوموړي کور ته طالبان ورغلي او نوموړي ته یې ویلي، چې په خپل سر څرګندونې د دوی د اصولو خلاف عمل دی.

نوموړي د خپل ګوند له یو شمېر غړو سره په ناسته کې ویلي، چې د امریکا ډرون الوتکې د افغانستان په فضا کې ګرځي او د افغانستان هوا اشغال شوې ده.

د حکمتیار په خبره؛ دوی په افغانستان کې د امریکا هېڅ ډول حضور او اشغال نه مني او له طالبانو یې غوښتي، چې د تام وېسټ وینا رد کړي.

هغه وايي: "ټام وېسټ په کانګرس کې ویلي وو، چې نن موږ په افغانستان کې فعال استخباراتي حضور لرو او د ترورېزم ضد زموږ اداره او حضور ډېر فعاله دی. دا عادي خبره نه ده، بلکې د یوه مسوول شخص خبره ده".

د حکمتیار په خبره، چې طالبانو باید په هماغه وخت کې دا څرګندونې رد کړی وی؛ ځکه ټام وېسټ ویلي، چې له طالبانو سره دوه میلیارده ډالره مرستې شوي دي.

هغه وویل: "ټام وېسټ ویلي، چې دوه میلیارده ډالره مو له طالبانو سره مرسته کړې ده او طالبان پر خپلو ژمنو ولاړ دي او عمل کوي".

نوموړي پر طالبانو غږ کړی، چې که دا مساله حقیقت نه وي؛ نو باید رد یې کړي.

افغانستان انټرنشنل - پښتو د ګلبدین حکمتیار له زوی حبیب الرحمان حکمتیار څخه د یادې موضوع په تړاو پوښتنه وکړه، چې نوموړي یې په ځواب کې وویل: "په سیاسي مبارزه کې لوړی ژورې شته او د استبداد او بې قانونۍ پر وړاندې د حق ویلو لپاره له ستونزو سره مخ کېدل طبیعي خبره ده."

نوموړي یاد بندیز رد نه کړ او ورته موضوع یې پر خپلې اېکس پاڼې هم ذکر کړې ده.

له هغه وروسته چې د ګلبدین حکمتیار او طالبانو تر منځ د هغه د استوګنځي د بدلولو او د حزب د ړنګولو پر سر ناندریو زور واخیست دا لومړی ځل دی چې ښاغلی حکمتیار د یوې توندې خبرپاڼې په خپرولو سره په ډېره زیږه ژبه نیوکې کوي، خو طالبانو لا په دې اړه غبرګون نه دی ښودلی.

د ارزګان د والي ویاند بلال ارزګاني نن دوشنبه د (وري ۲۷مه) پر خپله اېکس پاڼه ارزګان ته د ملا برادر د تګ خبر ورکړ.

د طالبانو د رییس الوزرا اقتصادي مرستيال ملابرادر په يوې غونډه کې د سېلابونو له امله د زيانمنو کورنیو سره خپله خواخوږي شريکه کړې او ويلي يې دي: « ارزګان ته د ورستیو سېلابونو په خاطر د زیانمنو خلکو سره خواخوږي څرګندولو لپاره راغلی یم او د مرستو ژمنه کوم.»

نوموړي زياتوي، چې د هېواد په هره سېمه کې د خلکو له ستونزو ځان خبرول یې مکلفيت دی.

برادر له خلکو څخه د «اسلامي نظام» د ملاتړ او همکارۍ غوښتنه هم کړې ده.

د طالبانو د رسمي شمېرو له مخې؛ وروستيو سېلابونو په هېواد کې ۳۳ کسان مړه کړي او ۲۷ نور يې ټپیان کړي دي.

طالب مسولانو د نور اورښتونو خبردارۍ هم ورکړی او د مرګ ژوبلې د زياتوالي اړوند يې اندېښنې ښودلې.

د طالبانو په خبره، چې همې سېلابونو د هېواد په بېلا -بېلو سېمو کې په زرګونه ګورونه، سړکونه، فرعي لاري او کرنيزې ځمکې هم ويجاړي کړي دي.

په ډېرو ولایتونو کې طالبانو د خلکو د ژغورلو خبر ورکړي دی.

په بغلان کې د طالبانو د ورزش ادارې د دوشنبې په ورځ په يوه خبرپاڼه کې ويلي، چې د دې ولایت د پلخمري په ولسوالۍ کې يې د ۵۰ پهلوانانو ترمنځ د وزلوبې (بزکشۍ) دوې ورځنۍ سيالۍ پای ته ورسولې.

د دوی د معلوماتو له مخې؛ په دې سياليو کې سمېع الله لومړی او اسدالله دویم مقامونه ګټلي دي.

د سياليو نندارې ته د بغلان او سمنګان د طالب مسوولانو ترڅنګ په زیات شمېر ننداره کوونکي هم ورغلي.

د بغلان او سمنګان د طالبانو د ورزش مسوولانو ويلي؛ هڅه کوي سيمه ييزو لوبو ته پراختيا ورکړي او د ولایتي لوبغاړو ترمنځ د یوالي فضا رامنځ ته کړي.