د کندهار په ارغستان ولسوالۍ کې د یوې زړې هاوان مرمۍ په چاودنه کې دوو ماشومانو ته مرګ ژوبله اوښتې ده. د سیمهییزو خلکو په خبره، دغه پېښه تېره ورځ په ملا شېرعلي کلي کې هغه مهال شوې، چې دغو دوو ماشومانو له یوې زړې هاوان مرمۍ سره لوبې کولې.
د سیمهییزو خلکو په خبره، په دغې چاودنه کې یو ماشوم وژل شوی او یو بل بیا ټپي دی.
تر دې وړاندې د افغانستان لپاره د ملګرو ملتونو ځانګړی راپور ورکوونکي ریجارډ بېنېټ د اپرېل څلورمې نېټې د ماین پاکۍ په برخه کې د مرستې او عامه پوهاوي له نړۍوالې ورځې په پار ویلي و، چې په افغانستان کې د ماینونو له امله ډېری قربانیان ولسي وګړي او په ځانګړې توګه ماشومان دي چې ځینې یې معلولېږي.
ورته مهال د ملګرو ملتونو سرمنشي ویلي و، چې ځمکني ماینونه، چاودېدونکي توکي او د جګړې پاتې شوني په مستقیم ډول په جګړهیزو سیمو کې له افغانستانه نیولې تر سوډان او اوکراین څخه تر غزې پورې د مېشتو مېلیونونو خلکو ژوند ګواښي.
تر دې وړاندې د ملګرو ملتونو د بشري مرستو د همغږۍ دفتر (اوچا) د یوه راپور په خپرولو سره ویلي و، چې په افغانستان کې د ۲۰۲۲ کال له جنورۍ څخه د ۲۰۲۴ کال تر فبرورۍ پورې د ماینونو او ناچاوده توکو له امله له ۱۴۰۰ زیاتو کسانو ته مرګ ژوبله اوښتې ده.
خو ورته مهال پېښو ته د رسېدو په چارو کې د ماينونو د تطهير او انسجام لپاره د طالبانو مشر نورالدين رستم خېل د ماین پاکۍ په برخه کې د پوهاوي او مرستې نړۍوالې ورځې په اړه جوړې شوې غونډې ته ویلي و، چې تېر میلادي کال کې د ښځو په ګډون ۵۵۵ تنو ته د ماین چاودنو له کبله مرګ ژوبله اوښتې ده.
