د امريکا د بهرنيو چارو وزارت د دوشنبې په ورځ ویلي چې د ختيځې اسيا په چارو کې د امريکا د بهرنيو چارو مرستيال وزير په بېجينګ کې له خپل چينايي سيال سره خبرې اترې وکړې. منځنی ختیځ، تایوان، د سوېلي چین سمندرګی او د روسیې له دفاعي صنعت څخه د چین ملاتړ د خبرو اترو اصلي موضوع وه.
د امريکا د بهرنيو چارو وزارت په يوه خبرپاڼه کې ويلي چې د ختيځې اسيا او ارام سمندر په چارو کې د امريکا د بهرنيو چارو وزارت مرستيال ډانيل کريتينبرينک د چين د بهرنيو چارو وزارت له اجراييوي مرستيال ماجاشو او د تایوان په چارو کې د دغه دفتر له مرستيال کيو کيمينګ سره وکتل.
د چین او تایوان په چارو کې د امریکا د ملي امنیت شورا جګپوړې مشرې سارا براون او په چین کې د امریکا د سفیر نیکولاس برنز په ګډون چارواکو د منځني ختیځ په شمول د دوه اړخیزو، سیمه ییزو او نړیوالو مسلو او د روسیې له دفاعي صنعت څخه د چین د ملاتړ په اړه خبرې وکړې.
په خبرپاڼه کې راغلي: «دغه غونډه د شخړو د مهار او همدارنګه د همکارۍ د پراختیا د زیاتېدو په موخه جوړه شوې وه چې د تېروتنو له امله د ګواښونو ډیرېدو مخه ونیسي.»
که څه هم امریکايي چارواکي وايي چې له څو میاشتو کړکېچ وروسته له بیجینګ سره د اړیکو چینلونه تر ډېره عادي شوي، خو خبرداری یې ورکړی چې په اوکراین کې د روسیې له جګړې د چین ملاتړ له واشنګټن سره د دواړو هیوادونو تر منځ مثبتې اړیکې ګواښي.
