د طالبانو احصایې ادارې خبر ورکړی چې په ۱۴۰۲ کال کې د افغانستان د صادراتو کچه د ۱۴۰۱ کال پرتله ۳۲،۹ میلیونه ډالر توپیر ښيي، چې څه باندې ۱۹ سلنه کمه شوې ده. دغې ادارې ویلي، چې تر تېرې کب میاشتې پورې د افغانستان د صادراتو کچه څه باندې ۱۴۱ میلیونه ډالره وه.
دغې ادارې د سه شنبې په ورځ (وري ۲۸مه) په ایکس پاڼه لیکلي چې په دې موده کې د افغانستان د وارداتو کچه کابو سل میلیونه ډالره زیاته شوې ده، چې په ۱۴۰۱ کال کې د افغانستان د وارداتو کچه ۶۹۰،۴ میلیونه ډالره وه، خو په ۱۴۰۲ کال کې دغه کچه ۷۸۹،۶ میلیون ډالرو ته لوړه شوې ده.
د دغې ادارې د شمېرو له مخې، په ١٤٠١ کب میاشت کې د افغانستان صادرات ١٧٤ ميليونه ډالره وو، چې په ١۴٠٢ لمريز کال کې دغه شمېر ١٤١،١ ميليون ډالرو ته راټيټ شوى دى.
د طالبانو احصایې ادارې په یوه کال کې په صادراتو کې د ۱۹ سلنې کموالي خبر ورکړی، په داسې حال کې چې د طالبانو د سوداګرۍ وزارت په ټول ۱۴۰۲ کال کې په صادراتو کې ۶ سلنه کموالی ښودلی دی.
په ۱۴۰۲ کال کې د افغانستان او پاکستان تر منځ د ځمکې له لارې سوداګري د سرحدي شخړو او سوداګریزو اختلافاتو له امله څو ځلې ګډوډه شوې وه.
همدارنګه پاکستاني رسنیو راپور ورکړی چې پاکستان له افغانستانه د ډبرو سکرو واردات کم کړي چې د طالبانو د حکومت تر ټولو مهم سوداګریز محصول دی.
د طالبانو د احصایې او معلوماتو اداره وايي، چې په ۱۴۰۱ کال کې د افغانستان ډېری صادرات پاکستان، هند او چین ته کېدل، خو په ۱۴۰۲ کال کې د افغانستان ډېری صادرات پاکستان، هند او متحده عربي اماراتو ته شوي.
