له هغه وروسته چې طالبانو د ګلبدین حکمتیار په مشرۍ د اسلامي حزب بریا ټلویزیون او د صلاح الدین رباني په مشرۍ د جمعیت اسلامي نور ټلویزیون خپرونې بندې کړې؛ دغه اخیستل شوي ګام د رسنیو د ملاتړو سازمانونو پراخ غبرګونونه راوپارول.
د افغانستان د خبریالانو مرکز دغه کړنه د قانون خلاف ګڼلې او د دغې پرېکړې د بېرته اخیستو او بې له قیده او شرطه د دغو رسنیو بېرته پرانیستو غوښتنه یې کړې ده.
دغه مرکز د یوې خبرپاڼې په خپرولو سره د دغې کړنې په غندنې سره ویلي، چې دغه ډول ګامونه پر ازادو رسنیو د لا فشارونو راوړل او محدودول دي.
دوی وایي، د رسنیو په قانون کې د هېواد ټولو وګړو او سیاسي حزبونو ته د رسنیو د جوړولو حق ورکړل شوی.
دغه بنسټ زیاته کړې:« په قانون کې راغلي، چې رسنۍ د خپلو حرفوي کارونو په ترسراوي کې ازادې دي او مسوولان باید د دوی پر کارونو محدودیت ونه لګوي او نه یې هم وګواښي.»
ورته مهال له افغان خبریالانو د ملاتړ سازمان د اندېښنې په څرګندولو سره ویلي، هره ورځ د بیان او رسنیو د ازادۍ پر حق بندیزونه او محدودیتونه زیاتېږي او د یوې بشپړې تیاره او مستبد چاپېریال لاپسې پراخېږي.
دغه سازمان وایي، اصلي ستونزه دا ده چې په دې اړه وار له مخه ټاکلي قوانین نه شته.
د خبریالانو د ملاتړ سازمان پر دغه اصولي دريځ ټینګار کوي، چې باید په افغانستان کې د ټاکل شویو ملي او صنفي قوانینو پربنسټ د رسنیو له حقوقي چارو سره بشپړ ځانګړی او تخصصي چلند وشي.
دغه سازمان زیاته کړې ده، چې د بیان او رسنیو د ازادۍ له نظره په افغانستان کې روان حالت د نړۍ له هېڅ هېواد سره د پرتلې وړ نه دی.
